Membru VIII Governu namin-21 simu pose husi Prezidente Repúblika, Francisco Guterres ‘Lú Olo’, iha Palásiu Prezidensiál, Bairro Pité (24/06). Imajen Tatoli/António Gonçalves

DILI, 24 juñu 2020 (TATOLI) – Hafoin simu pose husi Prezidente Repúblika Francisco Guterres “Lu-Ólo”,  Sekretáriu Estadu Kooperativa, Elizário Ferreira, hataten durante nia mandatu sei fó prioridade ba programa H-4 (Harii, Hametin, Hadi’a no Haburas) hodi dezenvolve kooperativa sira sai susesu iha Timor-Leste.

“H-4 ne’e mak ha’u sei implementa iha Kooperativa, atu nune’e bele susesu iha tinan-rua ne’e nia laran. Tanba Ha’u mai ho objetivu ida mak seidauk harii, ha’u harii, ne’ebé maka presiza atu, bele hadi’a no presiza haburas ita haburas,” tenik Sekretáriu Estadu ne’e ba Agência Tatoli, hafoin simu pose husi Xefe Estadu, iha Palásiu Prezidensiál, Bairro Pité, kuarta ne’e.

Nia dehan, programa prioridade maka atu hadi’a kooperativa sira ne’ebé durante ne’e la la’o, harii kooperativa iha fatin ne’ebé seidauk eziste kooperativa no hakarak haburas grupu produtivu sira iha nível baze.

“Ha’u-nia planu orsamentál 2020 no 2021 sei bazeia ba programa H-4, maibé foin simu pose ne’ebé tama ba servisu mak haree saida de’it mak prioridade atu ita tau iha planu orsamentál,” nia akresenta.

Sekretáriu Estadu Elizário konsidera atu fó susesu ba dezevolvimentu kooperativa iha Timor-Leste presiza ema hotu nia apoia, liuliu ekipa ne’ebé estabelese ona iha Sekretaria Estadu kooperativa anteriór nia.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here