Membru VIII Governu hamutuk 43 hasai Fotografia ho Prezidente Repúblika, Francisco Guterres ‘Lú Olo’, hafoin membru na’in-21 simu pose, iha Palásiu Prezidensiál, Bairro Pité, kuarta (24/06). Imajen Tatoli/António Gonçalves

DILI, 24 juñu 2020 (TATOLI) – Prezidente Repúblika (PR), Francisco Guterres ‘Lú Olo’, nota katak prátika korrupsaun iha Administrasaun Públika tomak no organizasaun nia laran hatudu  katak morál sosiedade nian menus ba beibeik, tanba ne’e nia konsidera bainhira iha sinál ba prátika korrupsaun presiza parte hotu nia atensaun.

“Sinál korrupsaun tenke sai preokupasaun ba ema hotu no ema hotu tenke luta hasoru prátika hirak-ne’e ho forma koordenadu no efikásia,” tenik Xefe Estadu liuhosi diskursu iha serimónia pose ba Membru Governu na’in-21 iha Palásiu Prezidensiál, Bairro Pité, kurta ne’e.

Tuir Aman Nasaun ne’e, Estadu presiza envolve sidadaun no sosiedade sivíl organizadu hodi habiit instituisaun Estadu sira ne’ebé simu kna’ar atu kombate prátika sira-ne’ebé la tanen funsaun públika sira ho di’ak no estraga instituisaun sira-nia lala’ok demokrátiku.

Ba kestaun ne’e, nia mós dehan presiza iha fiskaliza ba partidu sira bainhira uza osan iha sira-nia atividade no prosesu eleitorál sira.

PR Lú Olo konsidera aktu korrupsaun sai ona hanesan fenómenu ne’ebé afeta ona nasaun barak iha mundu, inklui Timor-Leste tanba korrupsaun hanesan moras ba Estadu no fó impaktu ladi’ak ba lala’ok Administrasaun Públika.

“Korrupsaun bele hamate valór prinsipál sira no halakon prátika importante lubuk ida hanesan transparénsia,” nia akresenta.

Tanba ne’e, Xefe Estadu dehan urjente tebes  Parlamentu Nasionál (PN) diskute no aprova Lei Anti-Korrupsaun (LAK).

Daudaun ne’e, Komisaun A ne’ebé trata asuntu Konstitusionál no Justisa hahú halo diskusaun ba LAK iha Munisípiu Manufahi, molok lori ba plenária hodi hetan aprovasaun.

Totál artigu husi Lei ne’e hamutuk 121, maibé foin mak aprova artigu 22.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here