Komunidade sira iha Sede Suku Fatuhada bainhira forma hodi simu ona subsidu $200 ne'ebe Governu fo tanba implementasaun Estadu Emerjensia durante fulan rua relasiona ho COVID-19. Imajen/Antonio Goncalves

DILI, 24 juñu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, informa katak sei prolonga tan loron tolu (3) to’o loron haat (4) atu bele aselera prosesu pagamentu subsídiu $200 iha Munisípiu Dili.

Notísia Relevante: Ezekusaun Prosesu Pagamentu Subsídiu $200 Atinje Ona 94%

“Ita sei prolonga tan loron tolu (3) to’o loron haat (4) ba suku rua (2) hanesan Suku Bairru Pité no Comoro nian atu nune’e bele aselera no bele finaliza lalais hodi konklui relatóriu hotu hosi Munisípiu sira,” dehan Rui Manuel Gago Exposto ba jornalista sira liuhosi konferénsia imprensa iha salaun MSSI, Caicoli, Dili, kuarta ne’e. 

Nia subliña, Suku Bairru Pité benefisiáriu ne’ebé mak seidauk simu purvolta ema 1.000-resin no Suku Comoro benefisiáriu hela 3.000.

“Ho ida ne’e, ita nafatin presiza aselera tan ba prosesu pagamentu subsídiu $200 nune’e finaliza iha loron tolu-haat nia laran,” nia esplika.

Diretór Jerál MSSI ne’e hateten, prosesu pagamentu subsídiu uma-kain hela Munisípiu Dili, suku rua (2) ne’e mak seidauk bele finaliza tuir kalendáriu pagamentu hosi Governu tanba benefisiáriu mak barak liu nune’e demora.

“Maibé ita-nia ekipa pagamentu hosi Munisípiu mós mai suporta no haforsa ona ekipa Dili nian, nune’e bele aselera no finaliza iha semana ne’e,” nia dehan. 

Jornalista : Osória Marques

Editór      :  Cancio Ximenes

HAKEREK NO HATÁN

Please enter your comment!
Please enter your name here