Ministru Petróleu no Minerál, Víctor da Conceição Soares. Imajen Tatoli/António Gonçalves

DILI, 24 juñu 2020 (TATOLI) – Ministru Petróleu no Minerál emposadu, Victor da Conceição Soares, konsidera Ministériu Petróleu no Minerál (MPM) sai hanesan sentrál ba Timor-Leste tanba foku ba rikusoin sira iha tasi no rai-maran hodi bele hatama reseita ba kofre Estadu, tanba ne’e presiza tau atensaun maka’as tanba ministériu ne’e abandonadu durante tinan-rua ona.

“Ministériu ne’e abandonadu ona dezde impase politika mosu, ne’ebé ha’u hanoin katak ida-ne’e problema boot ida ne’ebé ha’u tenke fó atensaun. Tanba ne’e ha’u ho ekipa tékniku sira sei diskute hodi responde situasaun ne’e liuhosi programa kurtu prazu, mediu no longu prazu,” tenik Ministru Victor, hafoin simu pose husi Xefe Estadu iha Palásiu Prezidensiál, Bairro Pité, kuarta ne’e.

Dezde Membru VIII Governu Konstitusionál ne’ebé lidera husi Primeiru-Ministru, Taur Matan Ruak hetan pose dahuluk iha 22 juñu 2018, kargu ba Ministru Petróleu no Minerál sei mamuk, hafoin Ministru Victor hetan nomeasaun.

Governante ne’e komprometidu sei kontinua mantein programa sira ne’ebé estabelese ona iha MPM tuir Lei Orgánika VIII Governu Konstitusionál nian.

“Ha’u sei la ba hala’o buat foun ida maibé sei mantein nafatin programa prioridade sira ne’ebé iha ona,” nia akresenta.

Tuir nia, hafoin simu pose nia sei haree prioridade sira ne’ebé tenke halo urjente.

“Polítikamente iha ona informasaun atu halo atuasaun, ha’u labele ko’alia kedas agora tanba ha’u presiza rona informasaun husi ekipa tékniku sira,” nia tenik.

Kona-ba negosiasaun Timor-Leste ho Austrália ba dezenvolvimentu Greater Sunrise, nia dehan asuntu tékniku ne’ebé hala’o ona husi Ministru anteriór sira nia parte sei kontinua mantein tanba hakarak mina tenke dada mai iha Timor-Leste.

“Ha’u husu ba tékniku sira atu atualiza dadus ne’e mai ha’u, nune’e ha’u bele hatene hodi hala’o programa ka polítika,” nia subliña.

Antes ne’e, Prezidente Autoridade Nasionál Petróleu no Minerál (ANPM), Gualdino da Silva, informa prosesu negosiasaun ba Greater Sunrise la’o hela iha nível bilaterál no trilaterál, no iha tinan ne’e bele finaliza ona konseitu ba dezenvolvimentu Greater Sunrise.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here