Membru VIII Governu hamutuk 43 hasai Fotografia ho Prezidente Repúblika, Francisco Guterres ‘Lú Olo’, hafoin membru na’in-21 simu pose, iha Palásiu Prezidensiál, Bairro Pité, kuarta (24/06). Imajen Tatoli/António Gonçalves

DILI, 24 juñu 2020 (TATOLI) – Primeiru-Ministru (PM), Taur Matan Ruak, rekoñese durante ne’e VIII Governu Konstitusionál hasoru dezafíu ne’ebé boot tebes, maibé iha konfiasa bele ultrapasa situasaun hirak ne’e.

“Ha’u hatete loloos katak dezafíu boot tebes, maibé karik ita iha konfiansa no forsa ánimu, ho vontade firme atu manán maka ita sei alkansa objetivu husi promesa ne’ebé Governu be troka malu tranzmite ona atu transforma Timor-Leste sai nasaun ida riku, forte no seguru, iha tempu hanesan bele alkansa modernidade no prosperidade,” tenik PM Taur  liuhosi diskursu iha serimónia pose ba Membru Governu iha Palásiu Prezidensiál, Bairro Pité, kuarta ne’e.

Prezidente Repúblika Francisco Guterres ‘Lú Olo‘ fó pose ba Membru Governu na’in-21  hodi taka prosesu formasaun VIII Governu Konstitusionál.

“Ita iha timor-oan balun husi timor-oan hirak ne’ebé di’ak tebes atu hamutuk ho sira no dezenvolve nasaun ne’e, hodi hetan konfiansa no esperansa Povu,” Xefe Governu subliña.

Tuir nia, Governu ne’ebé nia lidera hakarak nasaun ne’e bele atinje meta no indikadór sira husi dezenvolvimentu nasionál, umanu no ekonómiku ne’ebé prevee ona iha Planu Estratéjiku Dezenvolvimentu Nasionál (PEDN) no iha Roteiru ba Implementasaun Objetivu Dezenvolvimentu Sustentável (ODS).

“Ita hotu hakarak to’o tinan 2030 bele sai nasaun ho rendimentu médiu-a’as, ne’ebé labele haluha ka husik hela ninia sidadaun sira nein ida, tanba país ne’e nein lakon-neon bainhira hasoru susar oioin, maibé sei enfrenta nafatin ho fiar-metin no determinasaun hanesan dezafíu todan hirak ne’ebé maihusi katástrofe, dezastre naturál no husi pandemia COVID-19,” nia akresenta.

PM Taur dehan loloos ema hotu iha nasaun ne’e bele halibur malu sai ida de’it ba objetivu no prinsípiu komún sira hodi hadi’a no moris di’ak ba povu, liuliu luta hasoru moris-ki’ak no má-nutrisaun, defeza integridade no soberania nasionál sira ba protesaun direitu no liberdade fundamentál ne’ebé konsagra  iha Konstituisaun liuhosi servisu, empeñu, lealdade no dedikasaun.

Biban ne’e, nia fó hanoin, la kle’ur tan Governu sei aprezenta proposta foun Orsamentu Jerál Estadu tinan 2020 nian ho objetivu atu kontinua investe nafatin ho ritmu ne’ebé di’ak iha populasaun sira-nia moris-di’ak no iha infraestrutura fundamentál sira hodi dezenvolve nasaun ne’e.

Governu mós kria estabilizasaun no rekuperasaun ekonómika efetiva ba uma-kain 298.000 iha munisípiu hotu no rejiaun sira, hodi halo reabilitasaun no rekuperasaun ba infraestutura ne’ebé hetan estragu husi dezastre naturál.

“Ita presiza tebes hakbesik-an liután ba ita-nia sidadaun sira, la’ós de’it atu hatene  dimensaun loloos husi dizigualdade no husi problema hirak ne’ebé mosu iha sosiedade nia leet, maibé mós atu hatán lalais ho klareza no vizaun, ba sira-nia espetativa no ba dezafíu ne’ebé sira hasoru,” Xefe Governu afirma.

Ho nune’e, Xefe Ezekutivu hato’o agradesimentu ne’ebé kle’an ba Membru Governu sesante sira ne’ebé entre juñu 2018 to’o juñu 2020 simu ona misaun nobre atu ukun país, maibé tanba motivu polítiku tenke husik hela Governu.

“Agradese ba sira-nia empeñu, dedikasaun, lealdade no espíritu misaun nian, ne’ebé bainhira asume dezafíu atu halo parte ba VIII Governu Konstitusionál. Agradese mós ba membru foun ne’ebé hakarak integra iha VIII Governu Konstitusionál, ba períodu entre 2020 to’o 2023,” nia realsa.

Xefe Governu mós agradese ba sidadaun, família, komunidade, emprezáriu, parseiru dezenvolvimentu sira no Organizasaun Naun-Governamentál sira ba apoiu no konfiansa ne’ebé fó filafali ba Governu.

“Ami sei konta nafatin ho imi-nia tulun no vontade tanba ha’u fiar katak hamutuk ita sei manán futuru no konkista dezenvolvimentu ba Timor-Leste ne’ebé moris iha justisa no igualidade, fraternidade no toleránsia,” tenik PM.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here