Imajen Espesiál.

DILI, 23 juñu 2020 (TATOLI)–Prosesu pagamentu ba agregadu família iha munisípiu Lautem komesa hosi loron 09 juñu no konklui ona iha 22 juñu ne’ebé taka iha suku Fuiluru.

Diretór Sentru Solidariedade Sosiál Lautem, Paulo Pinto, liuhosi telefonika ba Ajénsia Tatoli hateten, iha loron 22 fulan ne’e, hamutuk ho autoridade munisipál nian halo ona konferénsia imprensa hodi hato’o relatóriu sumáriu jerál ba nasionál, hodi hateten katak pagamentu ba suku 34 iha munisípiu Lautem konklui (ramata) ona no sei submete relatóriu ba iha nasionál iha loron 23.

“Ami submete ona relatóriu ba iha nasionál iha loron 23 fulan ne’e iha Ministériu Solidariedade Sosiál no Inkluzaun (MSSI) nasionál,” Paulo Pinto informa.

Nia hatutan, iha konferénsia imprensa ne’e, Adminstradór ho ekipa agradese no fó obrigadu ba autoridade lokál sira hotu kompostu hosi postu administrativu lima no entidade hotu ne’ebé kontribui ba prosesu ne’e tomak, hodi konklui duni pagamentu iha munisípiu ne’e.

Nia dehan, rezultadu pagamentu subsídiu apoiu monetáriu ba Uma Ka’in iha munisípiu Lautém, totál uma ka’in Aprovadu hamutuk  28.472 ho totál Orsamentu Aprovadu $ 3,694,400.00.

“Totál uma ka’in ne’ebé mak selu ona hamutuk 17.116 ho nia totál orsamentu $3.423.200.00. Totál uma ka’in ne’ebé mak la selu, 1.356 ho nia balansu orsamentu hamutuk $271.200.00,” diretór ne’e hateten.

Kona ba persentajen Pagamentu  Apoiu Agregadu Familiar Nível Munisipiu Lautém, nia dehan, ezekuta ona 93%, no lá Ezekuta 7%, iha ne’ebé totál uma ka’in ne’ebé mak aprezenta  “Ficha família no Kartaun Eleitoral hamutuk 13.984.

Alende ne’e, nia hatutan, totál uma ka’in aprezenta Deklarasaun Dokumentu Lakon hamutuk  802, Reprezentante husi Membru Familia hodi simu subsídiu hamutuk 2.420,  totál reklamasaun uma ka’in ne’ebé la sai iha lista editais hamutuk 348, no mós totál Reklamasaun ba uma ka’in ne’ebé foin aprezenta dokumentus iha tempu pagamentu hamautuk 615.

Kona-ba reklamasaun sira ne’e, Diretór Paulo Pinto hateten, sei fó tempu loron 15 no Sentru Solidariedade Sosiál no Inkluzaun munisípiu nia papél mak submete mai iha nasionál  atu nune’e bele konsidera.

“Bainhira sira deside katak, bele tama ona iha kategoria elijivel hodi hetan pagamentu, maka sentru solidariedade sei aviza fila-fali ba komunidade hodi bele hatene katak, konsidera ona husi nível polítika ministériu ninian,” Paulo Pinto subliña.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here