Estudante Eskola Báziku Sentrál, 30 Agostu, Comoro bainhira partisipa lansamentu laboratóriu siénsia. Foto Tatoli: Rafy Belo

DILI, 24 juñu 2020 (TATOLI)-Eskola Ensinu Báziku Sentrál Terseiru Siklu 30 de Agostu Comoro, kuarta ne’e, tenki haruka fila estudante kuaze na’in 10 ba sira-nia uma tanba la uza máskara  hodi partisipa prosesu aprendizajen.

“Ami fó ona avizu ba estudante sira semana ida antes eskola ne’e hetan verifikasaun husi Ministra Edukasaun no husi delegasaun Ministériu Saúde nian. ami husu ba estudante sira tenki uja máskara, maibe ita nia estudante kuaze na’in 10 mak la uza máskara entaun ita haruka fila,”dehan Diretór EBS 30 de Agostu Comoro, ohin.

Tanba ne’e, Dirijente eskola públiku ne’e husu ba inan-aman husi kada estudante idaidak atu prepara máskara ba oan sira hodi partisipa iha prosesu aprendizajen ne’ebé daudaun ne’e la’o ona.

“Ami avizu tiha ba estudante ne’ebé mak la uza máskara ami la admite sira atu tama eskola maibé haruka fila ba uma,”katak nia.

Nia esplika, eskola foti desizaun ne’e hodi kumpre padraun sira ne’ebé maka antes ne’e, Ministériu Saúde ho Ministériu Edukasaun Juventude no Desportu (MEJD) estabelese ona atu halo prevensaun ba surtu COVID-19.

Padraun hirak ne’ebé maka MS ho MEJD estabelese ona ba kada eskola sira presiza  kumpre maka tenki prepara máskara ba estudante, tanke bee moos, kria distansiamentu sosiál no fizíku, kria fatin lixu no seluk tan.

Maski doadór sira apoiu ona máskara ba Ministériu Edukasaun Juventude no Desportu, maibé to’o ohin seidauk halo distribuisaun ba eskola idaidak hodi kontinua fahe ba estudante sira.

Entretantu, EBS 30 de Agostu Comoro, re-ativa ona prosesu aprendizajen ba estudante sira iha loron 16 fulan juñu tanba hetan ona aseitasaun husi Ministériu Saude no Ministériu  Edukasaun.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here