Ministru Justisa, Manuel Cárceres da Costa. Imajen/Egas Cristovão

DILI, 24 juñu 2020 (TATOLI) – Ministru Justisa (MJ), Manuel Cárceres da Costa, hateten sei foti medida ka sansaun ba arendatáriu sira ne’ebé la kumpre sira nia devér selu arrendamentu ba Estadu.

Tuir dadus hosi Sekretária Estadu Terras no Propriedade (SETP) katak, arendatáriu hamutuk 4225 ne’ebé hala’o kontratu ho Governu, mai hosi ema indivual, emprezáriu no seluk tan, ne’ebé utiliza patrimóniu movéis no imoveis Estadu nian hodi utiliza no hala’o atividade.

Tuir kontratu arendatáriu hirak balun selu mensalmente, kada fulan neen no tinan ne’ebé depende ba kustu, maibé la kumpre obrigasaun hodi selu taxa ba Estadu dezde iha tinan 2017 to’o mai agora.

Ba Ajénsia Tatoli, kuarta ne’e, iha Palacio do Governo, Ministru Manuel Cárceres da Costa, esplika tuir lei no kontratu ne’ebé aplika, kuandu arendatáriu la kumpre sei hetan sansaun.

“Estadu sei foti medida no sansaun ba sira ne’ebé la selu mak bele hakotu kontratu, bele lalin malu ba Tribunál, no bele bolu parte sira bele tur hamutuk ko’alia bainhira mak selu,” afirma Manuel Cárceres da Costa.

Antes ne’e, Ministru Manuel Cárceres da Costa, hasai ona deklarasaun ida ba arendatáriu sira hodi fó prazu durante loron-30 iha janeiru 2020 liu ba atu arendatáriu sira kumpre sira nia devér selu arrendamentu.

Hatán kona-ba preokupasaun arrendatáriu sira nian relasiona ho impasse polítika ne’ebé dura dezde iha tinan 2017 to’o mai iha agora ho krize sanitaria COVID-19, ne’ebé fó ameasa ba ema indivíduu no emprezáriu nia rendimentu hodi afeta selu tarde, tanba ne’e husu Governu atu redús kustu arrendamentu nian, Ministru Manuel Cárceres lia-tun dehan, Governu liuhosi Ministériu Justisa hasai despaxu liuhosi medida rekuperasaun ekonomia iha implementasaun estadu emerjénsia ne’e aplika izensaun livre ba arendatáriu sira durante fulan tolu de’it (april to’o juñu 2020) la selu taxa ba Estadu hodi bele hakmaan sira.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here