Ministru ba Prezidénsia Konsellu Ministru, Fidelis Manuel Leite Magalhães. Imajen Tatoli/Egas Cristovão

DILI, 24 juñu 2020 (TATOLI) – Estadu Emerjénsia (EE) faze datoluk ho durasaun loron-30, ne’ebé hahú iha tuku 00:00, 28 maiu to’o 23:59, 27 juñu 2020, sei ramata iha tempu badak, tanba ne’e Komisaun Interministeriál hahú hala’o diskusaun atu haree nesesidade ba estensaun.

Ministru ba Prezidénsia Konsellu Ministru, Fidelis Manuel Leite Magalhães, hateten Governu durante ne’e prepara ona kuardu legál sira atu nune’e iha kbi’it no kompeténsia forte atubele antesipa posibilidade importasaun moras COVID-19 no bele atua bainhira iha ameasa surtu ka kalamidade sira seluk.

“Razaun importante ne’ebé labele estende tán Estadu Emerjénsia tanba Governu konsidera katak atuasaun sira durante no to’o agora iha rezultadu ne’ebé pozitivu tebes, laiha númeru mate, Timor-Leste konsidera katak hanesan país ida susesu ba ninia atuasaun, to’o agora mós númeru ba transmisaun lokál laiha tanba ita hatene katak moras COVID-19 ne’ebé antes ne’e iha hanesan importadu,” tenik Ministru Fidelis iha Palásiu Governu, kuarta ne’e.

Nia haktuir, iha reuniaun interministeriál semana kotuk Governu rona aprezentasaun husi Sentru Integragdu Jestaun Krize (CIGC, sigla portugés).

“Aprezentasaun ne’e, iha rekomendasaun ne’ebé todan katak ita presija hadi’a ita-nia medida sira maibé laiha nesesidade ona atu halo estensaun tán Estadu Emerjénsia dala ida tan,” nia akresenta.

Maski nune’e, governante ne’e informa, Governu sei realiza hikas reuniaun Komisaun Interministeriál hodi tetu estensaun EE.

“Estadu Emerjénsia atu hotu ona, bainhira Governu iha intensaun atu estende karik presiza prepara atu halo tan pedidu ba Prezidente Repúblika no husu ba Parlamentu Nasionál ba aprovasaun, maibé to’o oras ne’e Governu la prepara pedidu,” relata Fidelis.

Xefe Estadu dekreta EE faze dahuluk, ne’ebé hahú entra ein vigór iha loron 28 marsu hahú oras 00:00  to’o 26 abríl 2020 oras 23:59, atu fó dalan ba Governu implementa médida espesífiku sira hodi prevene propagasaun COVID-19.

Haree ba nesesidade atu estende, Xefe Estadu promulga estensaun EE períodu daruak ho durasaun loron-30 tuir pedidu Govenu.

Nune’e, iha loron 27 abríl, Prezidente Relúblika, liuhosi Dekretu Prezidensiál númeru 32/2020 promulga estensaun Estadu Emerjénsia (EE) períodu daruak ho durasaun loron-30, hahú husi oras 00.00 loron 28 abríl to’o oras 23:59 27 maiu 2020.

Timor-Leste rejista kazu pozitivu COVID-19 dahuluk iha 21 marsu 2020 no kazu ikus liu rejista iha 24 abríl ho totál konfirmadu na’in-24 no provável na’in-haat.

Enkuantu, iha loron 15 maiu, liuhosi Sala Situasaun, CIGC deklara pasiente konfirmadu no provável rekuperadu hotu ona.

Kazu konfirmadu ne’ebé rejistadu iha Timor-Leste hanesan kazu importadu husi sidadaun ne’ebé halo viajen husi nasaun afetadu COVID-19 no Tama mai Timor-Leste liuhosi dalan fronteira terrestre no aeroportu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here