Prezidente Komisaun Funsaun Públika (KFP), Faustino Cardoso. Imajen/Antonio Goncalves

DILI, 24 juñu 2020 (TATOLI)–Prezidente Komisaun Funsaun Públika (KFP), Faustino Cardoso, hatete KFP sei re-aloka funsionáriu públiku ne’ebé afetadu hosi prosesu halakon Ministériu Planeamentu Investimentu no Estratéjiku (MPIE), ba instituisaun Estadu sira seluk.

“Funsionáriu sira lalika preokupa ba asuntu ne’e, maibé atu nafatin hatudu esperítu profesionalizmu, servisu ho di’ak no halo atendementu ho responsabilidade ba povu. Karik sei afetadu, KFP sei kontinua buka solusaun atu oinsá bele re-aloka ba instituisaun sira ne’ebé mak relevante”, Prezidente KFP, Faustino Cardoso, hatete ba jornalista sira iha Ministériu Finansa, Aitarak-laran, ohin.

Prezidente KFP ne’e hatutan mudansa governamentál ida sempre implika mós ba estrutura orgánika burokrásia ninian, tanba Governu ida mai ho nia polítika rasik no vizaun rasik, nune’e dala barak implika hodi halakon servisu no halakon instituisaun, halakon orgaun no halakon estrutura orgánika sira balun.

“Ida ne’e ita bele dehan normál no KFP iha ona esperiénsia atu oinsá hasoru no buka solusaun ba situasaun hirak ne’e, hahú kedas tempu uluk, bainhira ha’u sei lembra iha segundu mandatu hasoru situsaun sira hanensa ne’e, maibé konsege rezolve no inklui Rádiu Televizaun Timor-Leste ne’ebé mak ami hili hodi tau iha ministériu relevante sira”, nia haktuir.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here