Institutu Superiór Cristal (ISC). Foto: https://www.isc-tl.com/IN/

DILI, 24 juñu 2020 (TATOLI)-Institutu Superiór Cristál (ICS), oras ne’e estabelese ona postu prevensaun COVID-19 iha areadór eskola ne’ebá hodi  halo kontrolu ba temperatura isin kada estudante no profesór sira bainhira re-ativa prosesu aprendizajen iha tempu badak.

Prezidente Fundasaun Cristál, Agostinho dos Santos Gonçalves, informa postu kontrolu temperatura ne’e nu’udar inisiativa institusionál hodi fó tulun ba Ministériu Saúde no Sentru Integradu Jestaun Krize (CIGC-sigla portugés) para prevene transmisaun surtu coronavirus.

Estudante husi Fakuldade Saúde maka sei responsabiliza hodi jere postu ne’e durante situasaun COVID-19 iha Timor-Leste.

Nia dehan, postu ne’e sei presiza kompleta ho ekipamentu hanesan termoscan. Maibé problema maka daudaun ne’e loja sira iha kapitál laiha estoke hodi faan, tanba ne’e ISC hato’o ona pedidu ba Ministériu Saúde ho CIGC hodi fó apoiu.

“Ami iha ida maibé antigu ona ida ne’e mak ami prepara ona iha postu atu halo kontrolu,”informa, Agostinho dos Santos Gonçalves, ba Agência TATOLI, iha ISC Balide, tersa ne’e.

Instituto Superiór Cristál oras ne’e halo ona preparasaun hanesan monta tanke fase liman ida kompleta ho torneira 11, sabaun fase liman, instala ona balde fase liman iha kada sala, kria ona fatin so’e lixu, dezinfekta edifísiu eskola nian, kria ona distansiamentu iha kada sala no seluk tan.

Nia hatutan husi parte ISC nian sei konvida Ministériu Saúde ho Ministériu Edukasaun Juventude no Desportu (MEJD) atu halo observasaun ba kondisaun eskola ne’e hafoin ramata ona preparasaun iha tempu badak.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here