Primeiru-Ministru, Taur Matan Ruak prezide reuniaun Konsellu Ministru iha Palásiu Governu, kuarta (03/06). Imajen Tatoli/Egas Cristovão

DILI, 24 juñu 2020 (TATOLI) – Konsellu Ministru (KM) aprova Projetu Proposta Lei, ne’ebé aprezenta hosi Ministru ba Prezidénsia Konsellu Ministru, Fidelis Manuel Leite Magalhães, hodi halo alterasaun dahuluk ba Lei númeru 11/2017, 24 maiu nian kona-ba Migrasaun no azilu.

“Alterasaun ne’e ho objetivu autoriza Governu liuhosi rezolusaun ida hodi fó orden taka temporáriu postu fronteira sira bainhira haree risku pandemia ka emerjénsia saúde iha ámbitu internasionál tuir termu Regulamentu Sanitáriu Internasionál ne’ebé aprovadu ona husi Organizasaun Mundiál Saúde,” relata Ministru Fidelis hafoin reuniaun ezekutivu iha Palásiu Governu, kuarta ne’e.

Alterasaun diploma ne’e fó biban ba Governu liuhosi Rezolusaun, hodi bele bandu temporáriamente ema estranjeiru ne’ebé tama husi nasaun afetadu COVID-19 ka husi nasaun tránzitu ne’ebé iha surtu, haree ba moras nia grau transmisaun, haree ba nível kontaminasaun ne’ebé bele halo propagasaun iha territóriu nasionál, no hamosu risku ba saúde públika.

Ministériu Interiór hasai ona despaisu ida hodi haruka ba Diresaun Nasionál Servisu Migrasaun (DNSM) atu hahú loke hikas fronteira terrestre Motain hodi simu movimentu sidadaun timor-oan husi estranjeiru mai Timor-Leste.

Despaisu ne’e asina diretamente husi Ministru Interiór Interinu, Filomeno da Paixão de Jesus ne’e, hodi fó autorizasaun ba Servisu Migrasaun iha fronteira terrestre sira, atu loke iha iha loron kuarta kada semana durante oras rua nia-laran, hahú husi tuku 10:00 to’o tuku 12:00 Otl, hodi simu entrada timor-oan sira husi nasaun estranjeiru.

Antes ne’e, iha 15 abríl fronteira terrestre Batugade, Motain, loke kada semana dala-ida durante oras rua, hahú tuku 10:00 to’o 12:00 otl, ba transporte ne’ebé tula sasán importasaun nesesidade báziku husi Timór Osidentál, Indonézia mai Timor-Leste.

Dekretu Governu 6/2020, 8 abríl haktuir katak desizaun taka fronteira terrestre hodi la autoriza simu viajen timor-oan no ema estranjeiru tama territóriu Timor-Leste hodi hamenus risku propagasaun surtu COVID-19.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here