Sentrál Elétrika Hera. Imajen/espesiál

DILI, 24 juñu 2020 (TATOLI) – Reuniaun Konsellu Ministru (KM) aprova abertura prosesu aprovizionamentu ba kontratu akizisaun kombustível ba Sentrál Elétrika Hera no Betano, ne’ebé propoin hosi Ministru Obras Públika, Salvador Soares dos Reis Pires.

“Prosesu aprovizionamentu ida-ne’e ho objetivu halo akizisaun ba kombustível hodi halo produsaun ba enerjia elétrika ba períodu tinan-tolu nia laran, entre dezembru 2020 to’o dezembru 2023 no kontratu ne’e halo ho estimasaun katak presiza litru millaun 428 kombustível”, dehan Ministru ba Prezidénsia Konsellu Ministru, Fidelis Manuel Magalhães hafoin reuniaun KM iha Palásiu Governu, kuarta ne’e.

Antes ne’e, iha loron 28 fevereiru, Governu liuhosi KM deside empreza MATO Unipessoal Lda, ne’ebé halo konsórsiu ho NIKMAT Mujur SDN husi Malázia fornese konbustível ba Sentrál Elétrika Hera iha Lote 1, hamutuk ho empreza Esperansa Timoroan (ETO).

Kompañia ne’ebé fornese mina iha Sentrál Elétrika Hera mak ETO maibé ninia kontratu ramata ona iha loron 30 setembru 2019.

Kompañia ETO hahú kontratu foun ho Governu hodi fornese mina iha Sentrál Elétrika Hera Lote 1, hafoin desizaun ezekutivu iha 25 abríl 2017 ba tinan ida hafoin iha estensaun to’o agora.

Ho nune’e, Kompañia MATO no ETO mak daudaun ne’e fornese Komubustível iha Sentrál Elétrika Hera.

Reuniaun ezekutivu antes ne’e, aprova ona konkursu públiku fornesimentu kombustível ba sentrál elétrika tanba iha kompañia ida maka retira hafoin pasa ona konkursu, tanba ne’e Governu aprova Proposta Deliberasaun reabertura konkursu públiku ba fornesimentu kombustível ba Sentrál Elétrika Hera ba tinan 2019 no 2020.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here