DILI, 24 juñu 2020 (TATOLI) – Ministru Transporte no Komunikasaun, José Agustinho da Silva aprezenta Projetu Dekretu-Lei, ne’ebé Konsellu Ministru (KM) aprova ho alterasaun kona-ba rejistu nasionál ba ró-ahi no embarkasaun sira.
“Diploma ne’e hakarak atu regula rejistu ba ró-ahi iha Timor-Leste,” relata Ministru Prezidénsia Konsellu Ministru, Fidelis Manuel Leite Magalhães hafoin reuniaun KM iha Palásiu Governu, kuarta ne’e.
Ho diploma ne’e, ró-ahi no embarkasaun nasionál sira seluk tenke halo rejistu ba propriedade atubele dada sa’e bandeira Repúblika Demokrátika Timor-Leste (RDTL) nu’udar indikasaun ba nasionalidade no halai iha tasi tuir jurizdisaun Timor-Leste nian.
Governante ne’e subliña, rejistu ba ró-ahi no embarkasaun sira ho objetivu analiza priense rekizitu téknika sira no kondisaun seguransa ne’ebé importante bainhira atu halai iha tasi no bele fó protesaun ba ambiente iha tasi-laran hodi hanoin mós ba tipolojia.
Jornalista: Antónia Gusmão
Editora: Julia Chatarina
