Fromatura PNTL iha aniversariu PNTL ba da-XX, 27 marsu 2020. Imajen Tatoli/Eugénio Pereira

DILI, 24 juñu 2020 (TATOLI) – Governu liuhosi reuniaun Konsellu Ministru (KM) aprova Projetu Dekretu-Lei, ne’ebé aprezenta hosi Ministru Interiór ein ezersísiu, Filomeno da paixão de Jesus, kona-ba Regulamentu Disiplinár ba Polísia Nasionál Timor-Leste (PNTL).

“Projetu Dekretu-Lei ida-ne’e hakarak atu halo revizaun ba atuál Regulamentu Disiplinár PNTL nian, ne’ebé aprova ona iha tinan 2004 no seidauk atualizadu tuir nesesidade instituisaun ne’e nian no saida de’it maka nu’udar objetivu dezenvolvimentu no profisionalizasaun PNTL nian,” dehan Ministru ba Prezidénsia Konsellu Ministru, Fidelis Manuel Magalhães hafoin reuniaun KM iha Palásiu Governu, kuarta ne’e.

Regulamentu foun ne’e hatuur regra estruturadu PNTL lubuk ida hodi garante disiplina institusionál no profissional.

Regulamentu Disiplinár PNTL ne’e hodi haroman loloos objetivu legál husi Polísia moderna, ne’ebé kria hodi defende sidadaun sira no hodi bele hatuur disiplina ba relasaun fundamentál ba sosiedade nia moris.

Antes ne’e, PNTL propoin ba Ministériu Interiór atu halo revizaun ba regulamentu disiplinar PNTL nune’e bele fó kompeténsia ba Konselu Superior atu foti desizaun ba membru ne’ebé halo infrasaun.

Tuir PNTL regulamentu disiplinár iha frakeza balun maski lei orgánika hateten PNTL nia formasaun no disiplina idéntiku ho militár maibé prosesu infrasaun ba membru sira ne’ebé halo infrasaun krime no disiplinar ne’e kompla ba prosesu sivíl.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here