Fasilitadór PNDS hosi Postu Administrativu neen (6) hanesan Baucau Villa, Baguia, Vemasse, Venilale, Quelicai no Laga hamutuk ho ekipa Munisípiu Baucau (kontabilista, engineiro no official MIS) hala’o treinamentu reflesaun ba Manuál Operasaun Programa PNDS nian. Imajen/Espesiál.

BAUCAU, 23 JUÑU 2020—Hafoin Prezidente Repúblika dekreta Estadu Emerjénsia ba datolu iha fleksibilidade ba sidadaun no ajénsia estadu hodi hala’o knaar no reativa programa hanesan normál, sekretariadu tekniku PNDS halao hikas nia funsaun hanesan baibain hodi hahú halo treinamamentu reflesaun antes ba halo sensibilizaun no implementa konstrusaun iha suku no aldeia ne’ebé kobre ba faze dahuluk no daruak nian.

Iha abertura, Diretora Interina PNDS, Amelia Viegas, hateten objetivu hosi treinamentu ne’e atu hetan kumprendesaun ida hanesan kona-ba manuál implementasaun programa ne’eb’ PNDS utiliza ona durante ne’e inklui ninia revizaun no mudansa ba prosesu, no matadalan implementasaun PNDS siklu datoluk nian ne’ebé iha semana kotuk hahú ona iha nivel nasionál ba ekipa treinadór sira.

Hosi Munisípiu Baucau, nia dehan, ohin fasilitadór PNDS hosi Postu Administrativu neen (6) hanesan Baucau Villa, Baguia, Vemasse, Venilale, Quelicai no Laga hamutuk ho ekipa Munisípiu Baucau (kontabilista, engineiro no official MIS) hala’o treinamentu reflesaun ba Manuál Operasaun Programa PNDS nian.

“Treinamentu hanesan kultura ida ba PNDS antes hahú siklu foun. Iha tinan 2020 ita sei hala’o iha faze 1 & 2 ba postu 3 maka hanesan faze 1 ba Laga no Quelicai  no faze 2 ba Baucau Vila. Totál suku hamutuk 34, Baucau villa hamutuk suku 11 ne’ebé hetan ona orsamentu hosi duodésimu suku 10 hetan ona transferensia maibé falta suku Triloka tanba sei prosesa hosi tezouro nasional. Kona-ba Postu Adiministrativu Laga no Quelicai ne’ebé implementa faze 1 hetan fundu hosi Governu Australia ne’ebé hanaran Fundus Rekoperasaun Ekonomiku (FREK) ho montante orsamentu ba Suku 23 sei hetan sirkular husi ST-PNDS,” dehan Diretora Interina PNDS, Amelia Viegas, iha abertura treinamentu, tersa ne’e.

Diretora interina ne’ebé hanesan kontabilista munisípiu ne’e hatutan, husu ba parrtisipante sira atu aproveita didi’ak materia ne’ebé sei aprezenta ba ita hotu, atu nune’e ita fila ba ida-idak nia postu no suku, hodi fasilita komunidade sira iha suku ho hanoin ne’ebé hanesan tuir matadalan PNDS nian.

Entretantu, Reprezentante PARTISIPA hanesan asesor dezenvolvimentu munisipál, Mario Ramos Miguel,  hateten refreshing training ida-ne’e hanesan lori partisipante sira la’o iha prosesu ne’ebé hanesan iha Bandeira PNDS nia okos, hodi aproveita didi’ak materia sira-ne’e. Tanba ne’e, nia dehan, partisipante sira sei hasoru komunidade oinsá atu fasilita komunidade ho kualidade ne’ebé aas, hamutuk la’o tuir dutrina ne’ebé hakerek ona iha biblia PNDS nian.

Iha fatin hanesan, Prezidente Autoridade Munisípiu Baucau, António Augustu Guterres, fó korajen ba partisipante sira atu hala’o PNDS nia misaun no atu asegura polítika no programa Governu nian iha nivel munisípiu to’o suku no aldeia.

Ita-bo’ot sira integra iha laran ba diskusaun komunidade hodi fasilita deside prioridade no ke’e sira-nia hanoin ba prioridade sira ne’ebé nesesáriu liu tuir menu indikativu ne’ebé iha PNDS. Dalaruma iha problema iha suko ne’ebé lamenta hosi autoridade no komunidade sira, ha’u tenke bolu imi-nia jestór husu oinsá sira hatete ba ha’u fó tempu ami resolve. La to’o semana ida, sira aprezenta mai ha’u katak problema rezolvidouida. Ida-ne’e mak dehan PNDS perigu la’os besikusa. Brani foti konkluzaun no fó solusaun ba problema. Mezmu projetu ho skala ki’ik maibé dezenvolvimentu kontinua la’o iha baze, importante liu ba fasilitadór maka asegura kualidade,” nia hateten.

Iha Munisípiu Baucau, Postu Adiministrativu rua (2) ne’ebé implementa faze 1 maka Postu Adminstrativu Quelicai no Laga ne’ebé finansia hosi Fundu Rekoperasaun Ekonomiku (FREK). Fundu ne’e rasik apoiu hosi Governu Australia ba Governu Timor-Leste. Prioridade ne’ebé sei konstrui tuir menu indikativu maka Bee-Moos no Saneamentu (Sistema Bomba, Gravitasaun, Posu), Agrikultura no Seguransa Aihan hanesan sistema irigasaun eskala ki’ik no Kontrolu da cheias/drainajen/ponte ki’ik. Orsamentu ba faze rua (2) ne’ebé sei mai hosi orsamentu duodésimu sei implementa iha Postu Adiministrativu Baucau Villa ba suku 11.

Kontribuidór  : Marciano Patrício da Luz

Editór           : Cancio Ximenes

HAKEREK NO HATÁN

Please enter your comment!
Please enter your name here