Ministru Defeza, Filomeno da Paixão de Jesus. Imajen/António Gonçalves

DILI, 24 juñu 2020 (TATOLI)- Ministru Defeza, Filomeno da Paixão de Jesus, konsidera fallansu barak akontese iha instituisaun  Polísia Nasional Timor-Leste (PNTL) nia laran. Tanba ne’e, nia husu ba Primeiru-Ministru, Taur Matan Ruak ne’ebé assume mós kargu Ministru Interiór ho Vise Ministru Interiór, Antonino Armindo, atu hadi’a fallansu sira-ne’e.

Notísia Relevante : Ministru Filomeno Paixão Demite Membru PNTL Na’in-Neen

 “Iha buat barak maka presiza hadi’a iha instituisaun PNTL,  liuliu lejizlasaun sira, tanba atu halo reforma ne’e tenke hadi’a lejizlasaun polísia nian,” hateten Ministru Filomeno Paixão ne’ebé besik tinan-tolu nia laran asume pasta Ministru Interior internu.

Durante ne’e, Filomeno Paixão, hateten nia parte halo servisu maka’as ho ekipa Komandu PNTL hodi aprezenta sira-nia lei inklui estatutu PNTL nian ba Konsellu Ministru hodi diskute to’o Konsellu Ministru rasik aprova ona, ohin.

“Lejizlasaun ba PNTL nian, ohin, foin tama ba Konsellu Ministru no aprova ona regulamentu dixiplinár polísia nian, tuir mai sei mai tan polísia ninia estatutu hotu,” esplika Ministru Filomeno da Paixão.

Nia konsidera presiza hadi’a mós lejizlasaun sira liga ho Diresaun Nasionál Servisu Migrasaun no servisu Protesaun Sivíl ninia lei no regra sira.

Durante assume kargu Ministru Interiór Interinu , Filomeno konsege halo mudansa barak, liu-liu iha Instituisaun PNTL hodi aprezenta estatutu orgánika PNTL nian, no lei dixiplinár inklui iha Servisu Migrasaun halo mudansa ba servisu balun no hadi’a ninia lei sira hodi fó biban ba Servisu Migrasaun no programa servisu seluk tan.

Relatóriu servisu iha Ministériu Interiór nian sei entrega ba PM Taur no Vise Ministru Interiór ne’ebé, ohin lokraik, simu ona posse hosi Prezidente Repúblika, Francisco Guterres “Lú Olo”.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here