Ministra Edukasaun, Juventude no Desportu, Dulce de Jesus Soares. Imajen /Egas Cristovão

DILI, 23 juñu 2020 (TATOLI)-Ministra Edukasaun Juventude no Desportu Demisionária, Dulce de Jesus Soares, hateten daudaun ne’e prodúz ona kódigu ba estudante sira, antes husik ninia kargu iha semana ne’e.

Kódigu disiplina ba estudante ne’e ho kompromisu lima nu’udar matadalan atu regula estudante sira hodi hatene dever no responsabilidade.

“Kompromisu lima ne’e kompremete ba nasaun hanesan sidadaun, kompromisu ba aprendizajen hanesan estudante, kompromisu ba komunidade edukativa hanesan estudante, kompromisu ba eskola no kompromisu ba an rasik,” dehan Dulce hafoin hamutuk ho Diretóra EBS Fatumeta, Fernanda Caldeira Belo lansa kódigu disiplina ba estudante sira, iha EBS Fatumeta Dili, tersa ne’e.

Kompromisu hirak ne’e hatuur ona iha diploma ministeriál tanba ne’e sei fó sansaun ba estudante bainhira la obedese ba kódigu disiplina ne’e.

“Ita prodúz kódigu disiplina ba estudante sira ne’e atu regula liliu atetude estudante sira-nian ne’ebé falta respeita ba profesór sira, falta respeita ba ninia maluk estudante sira, baku malu iha eskola, ameasa malu ho grupu arte marsiál utiliza atributu ne’ebé la apropriadu, no estraga patrimoniu eskola nian,”esplika Dulce.

Regra ne’e hanesan indikadór atu regula no jere estudante idaidak hodi evita no prevene an husi atetude imoral sira ne’ebé maka akontese ona durante ne’e iha Territóriu Timor-Leste.

Iha biban hanesan Eis Prezidente Repúblika, José Ramos Horta, apresia ho MEJD tanba prodúz ona kódigu disiplina ba estudante sira no konkorda hodi implementa.

“Normalmente iha-ita nian rain ha’u ladun rona problema boot ita-nia estudante sira laiha displina iha eskola, maibé problema boot mak laiha kualidade ensinu, nutrisaun ladiak ba estudante sira, laiha eletrisidade  inklui laiha livru ba estudante sira, maibé ha’u konkorda kódigu displina ba alunu sira,” dehan Horta.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here