Komparasaun produtividade agrikultura entre Timor-Leste no nasaun seluk iha Ázia Sudeste ba produtu foos, batar no kafé (FAOSTAT 2020).

Husi: Lao Hamutuk

Introdusaun

Timor-Leste iha rekursu no poténsia hodi atinje soberania ai-han, katak bele halo produsaun ai-han ho ninia rekursu rasik ba konsumu iha rai laran, nune’e la depende ba nasaun seluk. Ita iha rai agrikultura ne’ebé sei orgániku, maioria populasaun sei halo produsaun ai-han, tasi ne’ebé riku ho riku soin tasi oi-oin no populasaun ne’ebé maioria ho idade serbisu. Rekursu no poténsia sira ne’e fó oportunidade boot ba ita atu haforsa ita nia setór agrikultura, agroturizmu, indústria prosesamentu ai-han no setór produtivu sira seluk hodi realiza soberania ai-han no hadi’ak povu nia moris. Maibé, poténsia no rekursu sira ne’e so fó rezultadu másimu bainhira ita dezenvolve liu husi programa agrikultura sira ne’ebé integra ho kontextu rai laran nian.

Realidade produsaun agrikultura oras ne’e

Iha tinan lima ikus ne’e Governu aloka média tokon $24 kada tinan ba setór agrikultura iha Orsamentu Jerál Estadu, no parseiru dezenvolvimentu sira aloka maizumenus tokon $20 kada tinan maibé dezempeñu setór agrikultura seidauk másimu. Ida ne’e bele nota iha produsaun agrikultura ne’ebé la hatudu aumentu no tuun sae bebeik. Iha tinan 2019 produsaun foos rai laran hamutuk 47,822 ton, atu hanesan deit ho produsaun iha 2008 ne’ebé hamutuk 48,154 ton. Produsaun batar iha 2019 mak 75,690 ton, kiik liu kompara produsaun iha 2005 ne’ebé mak too 95,433 ton. Dadus governu nian mós hatudu katak problema kiak no inseguransa ai-han no malnutrisaun sei aas liu iha area rural sira. Realidade hirak ne’e hatudu katak setór agrikultura seidauk sai baze forte ba soberania ai-han no hadi’ak povu nia moris.

Preokupasaun ida ne’ebé mosu dala barak iha diskusaun públiku sira mak investimentu públiku ne’ebé sei kiik liu husi estadu, ne’ebé refleta iha alokasaun Orsamentu Estadu kada tinan ba setór agrikultura ne’ebé ho persentajen entre 1.5 to’o 3.0% deit. Preokupasaun ida ne’e iha duni razaun tanba setór agrikultura mak atividade ekonomia prinsipál ba maioria uma kain no mós fonte prinsipál ai-han ba Timor-oan hotu nune’e tenki hetan atensaun ne’ebé boot liu. Maske nune’e iha mós programa sira ne’ebé hetan osan nato’on maibé la la’o ho di’ak. Kazu ne’ebé ema hotu bele haree mak programa fahe tratór 4000 resin ne’ebé la fó efeitu pozitivu boot. Iha mós programa ne’ebé muda ba bebeik husi governasaun ida ba governasaun seluk ka para iha dalan klaran deit hanesan programa Suku Ida Produtu Ida, Centro Dezenvolvimento Agricultura Comunitaria, Povu Kuda Governu Sosa, nsst.

Problema boot ida ba Timor-Leste mak programa agrikultura ne’ebé la integra didi’ak ba sistema agrikultura (farming system) ne’ebé eziste ona iha rai laran. Sistema agrikultura deskreve relasaun no interasaun fatór produsaun agrikultura sira ho fatór sosiál (hanesan nivel edukasaun no kondisaun), kultural (hanesan sistema patriarkal no serimónia tradisionál), no ekonomia iha nasaun ida ka área ida.

Sistema agrikultura mós inklui relasaun no interasaun infrastrutura existente sira hanesan estrada, barajen, no merkadu. Tanba la adapta no la integra ba kontextu sira ne’e, programa barak mak introduz maibé para iha dalan klaran ka kontinua maibé laiha sustentabilidade hanesan ezemplu balu iha leten. Ezemplu seluk mak hanesan fahe tratór ba area ne’ebé la presiza, introduz variedade ai-horis ne’ebé nia fini agrikultór sira susar atu asesu, introduz sistema kuda ka jestaun foun ba toos/natar lahó treinamentu,  nsst.

Timor-Leste mós hasoru dezafiu seluk hanesan area agrikultura ne’ebé kiik tebes no area kolleita ne’ebé kontinua tun ba bebeik. FAO estimatiza katak ita iha rai agrikultura maizumenus 380,000 ha deit no kontinua tuun. Iha 2019 area kolleita hare mak 22,328 ha no batar 30,136 ha. Ne’e kiik liu area kolleita iha tinan sanulu liu ba. Iha 2009, area kolleita hare mak 38,996 ha no area kolleita batar 71,340 ha (Bulletin Seguransa Ai-Han & Agricultura em Número 2005-2009). Rai ne’ebé iha mós maioria mak rai lolon ne’ebé halís entre 10-40% (FAO). Tanba rai ne’ebé limitadu laiha opsaun barak atu haboot ninia setór agrikultura liu husi aumenta area produsaun. Estratéjia di’ak liu mak hasa’e produtividade no diversifika produsaun, liu-liu ba produtu ai-han sira ne’ebé nasaun ne’e iha nanis ona. Too oras ne’e ita nia produtividade (mt/ha) sei kiik liu kompara ho nasaun viziñu sira.

Aleinde pontu sira iha leten, Timor-Leste nia agrikultura mós hasoru ameasa maka’as husi mudansa klimátika. Impaktu ida husi mudansa klimátika ne’e mak loron ne’ebé sai manas liu tan no udan ne’ebé tun la tuir tempu ho kuantidade ne’ebé muda bebeik. Estudu ne’ebé iha hatudu katak ita sei hasoru bebeik situasaun udan tun la tuir tempu no muda bebeik, bailoron naruk no temperatura sa’e, no udan tun maka’as demais (Pacific Climate Change Science). Kondisaun sira ne’e hotu sai ameasa ba produsaun agrikultura iha rai laran hanesan akontese ona iha tinan hirak ikus ne’e. Impaktu ne’e sei sai boot liu tanba maioria agrikultór sira seidauk simu informasaun no seidauk iha infrastrutura báziku nato’on hodi adapta ba konsekuénsia husi mudansa klimátika ne’e.

Alternativa ba oin

Timor-Leste labele kontinua tuir dalan ida ne’e. Ita iha matenek rasik kona-ba agrikultura no bele aprende husi esperiénsia nasaun seluk no mós estudu barak ne’ebé publika ona atu promove ita nia setór agrikultura di’ak liu tan. See haree fali ba karakterístika jerál Timor-Leste nia agrikultura, bele nota katak maioria atividade agrikultura baze iha família. Sensu 2015 hatudu katak maizumenus 80% família halo atividade agrikultura nian (kuda ai-horis no hakiak animal). Realidade mós hatudu katak maioria atividade sira ne’e halo iha nivel/eskala ne’ebé kiik. Kuaze 66% família sira ne’e iha rai kultivasaun menus husi 1 ha no 98% iha rai menus husi 5 ha (Oxfam 2020). Modelu dezenvolvimentu setór agrikultura ida ne’ebé besik liu ba realidade ida ne’e mak sistema agrikultura familiar no eskala kiik. Movimentu toos nain no servisu nain iha mundu tomak halo advokasia ona ba modelu ne’e ba tempu naruk no FAO rekoñese ona importánsia husi modelu ne’e hodi dedika dékada ida ne’e ba agrikultura familiar. Tuir FAO, agrikultura familiar sei sai xave importante ida hodi atinje agenda 2030 Objetivu Dezenvolvimentu Sustentável nian ne’ebé Timor-Leste mós adopta hela.

Modelu agrikultura familiar konserva no promove diversidade iha produsaun, no sai fundasaun forte ba diversifikasaun konsumu ai-han.  Agrikultór Timor-oan sira toman ona ho pratika ne’e maibé pratika ne’e hahú menus ona iha rai laran tanba komersializasaun agrikultura orienta ba monokultura, no mós dependénsia ba konsumu ai-han oin ida-rua deit. Sein diversifikasaun produsaun ai-han, redusaun iha konsumu ba ai-han espesífiku deit sei rezulta fali aumentu iha importasaun ai-han seluk tanba produsaun rai laran labele koresponde ba demanda ai-han diversifikadu. Sistema produsaun diversifikadu mós di’ak liu ba rai, ambiente no iha vulnerabilidade kiik liu ba ataka husi peste ka moras no mudansa klimátika. Timor nia matenek lokal sira hanesan ne’e rekoñese ona iha mundu tomak. To’o agora, matadalan permaculture tropical ne’ebé prodús husi ONG Timor-nian Permatil uza ona iha nasaun 174 no ema ‘download’ kapítulu dala 82,000 husi matadalan ne’e (Permatil global). Agrikultura familiar la kontra modernizasaun maibé foka liu ba adoptasaun teknolojia no inovasaun foun ne’ebé mak efetivu no sustentável liu.

Ikus liu, agrikultura familiar iha eskala kiik mos fó oportunidade di’ak liu ba ita atu kontinua ho sistema agrikultura orgánika. Oras ne’e ita nia produtu esporta hanesan kafé, kamii no maek hetan espasu di’ak iha merkadu global tanba karakterístika orgániku produtu sira ne’e iha. Aleinde ne’e, agrikultura familiar no orgániku mós loke dalan ba asesu merkadu fair trade nian ka merkadu justu nian ne’ebé buras ba bebeik iha mundu tomak inklui iha nasaun dezenvolvidu sira iha hanesan Japaun, Inglaterra no Estadu Unidus. Fairtrade ka merkadu justu laos deit oferese presu ne’ebé justu ba produtu agrikultura sira, maibé mós hakbiit agrikultór sira atu iha kontrolu boot liu ba sira nia toos/natar no sira nia moris (Fairtrade International 2020).

Konkluzaun

Atu atinje soberania ai-han iha Timor-Leste, setór agrikultura tenki dezenvolve tuir modelu ida ne’ebé integra ba kontextu rai laran. Bazeia realidade ne’ebé iha, agrikultura familiar eskala kiik mak modelu ida ne’ebé besik liu ba kontextu Timor-Leste nian. Agrikultura familiar eskala kiik sei konserva no promove diversidade iha produsaun, no sai fundamentu ba diversifikasaun konsumu ai-han, di’ak liu ba rai, ambiente, iha vulnerabilidade kiik liu ba peste/moras no mos mudansa klimátika. Agrikultura familiar iha eskala kiik mós fó oportunidade di’ak liu ba ita atu kontinua ho sistema agrikultura orgániku ne’ebé di’ak liu ba konsumu rai laran no asesu merkadu rai li’ur. (Atu hetan lista fonte informasaun sira ne’ebé uza ba artigu ne’e bele kontaktu ba autór).

HAKEREK NO HATÁN

Please enter your comment!
Please enter your name here