Prezidente Konsellu Imprensa, Virgílio da Silva Guterres .Imajen/Tatoli Egas Cristovão

DILI, 23 juñu 2020 (TATOLI)–Prezidente Konsellu Imprensa (CI), Virgílio Guterres, hateten mandatu Konsellu Imprensa ramata iha loron 10 maiu 2020 liubá no agora aumenta tan fulan ida ona, entaun ohin CI mai atu aprezenta relatóriu ba Parlamentu Nasionál (PN).

“Ohin ha’u mai ho konseleiru Konsellu Imprensa nian atu hato’o ami-nia relatóriu badak durante iha tinan haat (4) nia-laran, ofisialmente hatete katak ami na’in lima (5) nia mandatu ramata tiha ona,” Prezidente Konsellu Imprensa (CI), Virgílio Guterres, aprezenta relatóriu ba Parlamentu Nasionál liuhosi plenaria, tersa ne’e. 

Prezidente CI agradese ba parlamentu Nasionál ne’ebé mak hili nia no Paulo Araújo ne’ebé mak fó fiar ba sira hodi sai membru CI nian iha tinan haat nia-laran.

“Partikularmente, ami hatoo agradese ba partidu CNRT ne’ebé mak propoin ha’u-nia naran no partidu Fretilin ne’ebé mak propoin Paulo Araújo atu reprezenta interese públiku nian iha CI,” Prezidente CI hateten.

Nia hatutan, CI nia mandatu tuir lei mak atu promove no defende buat rua (2) hanesan liberdade imprensa no liberdade espresaun.

“Komponente ne’ebé mak ami defende mak liberdade imprensa, mak independénsia editoriál iha meiu komunikasaun hotu-hotu no mós laiha intervesaun hosi poder polítiku no poder ekonómiku iha sala redasaun nian,” nia hateten.

Iha aspetu ida ne’e, CI hakarak kompartilla iha uma fukun ida ne’e, katak CI nia monitorizasaun ba liu orgaun komunikasaun Estadu nian, Rádiu Televizaun Timor Leste (RTTL),” Virgílio haktuir iha PN.

Kona ba indepedénsia editoriál nian durante tinan (4), CI akompañia katak sei iha intervesaun hosi polítiku balun,  hosi ofisiál Estadu no Governu nian balun, tanba ne’e bandu atu influénsia iha sala redasaun RTTL nian.

Nia hatutan, liga ba suntu ida-ne’e sei iha mós ofisiál balun ne’ebé mak ameasa no bandu jornalista sira atu labele hakerek sira-nia opiniaun ba iha sira-nia mídia ka konta rede sosiál nian.

“RTTL, bele dehan katak estrutura empreza públika nian la fó kompeténsia ba Xefe ka Diretór redasaun no informasaun atu halo desizaun. Iha faktu katak informasaun ba to’o iha CI, katak iha asesór balun sei kontinua halo intervesaun,” nia dehan.

Aleinde ida ne’e, nia dehan, iha aspetu seluk mak nomeasaun polítika ba membru administrasaun RTTL nian, liuliu ba lideransa konsellu administrasaun nian ne’e, halo RTTL sai vulneravél tebes oinsá atu hametin sira-nia independénsia.

Tanba nomeasaun mai hosi polítiku, nia hateten, entaun lideransa iha RTTL mós depedente loos. durante ne’e, nia dehan, CI akompañia ba RTTL katak Governu ida mai troka no Governu seluk mai mós troka, entaun espasu laiha no liberdade laiha atu kria instituisaun ne’ebé di’ak hodi defende interese loloos, tuir konstituisaun artigu 41 pontu 5. 

Nia dehan, RTTL la’ós servisu públiku tanba nia empreza públika maka nia iha tendénsia barak liu atu buka lukru nune’e bele jere. Tanba empreza, atividade balun RTTL nian iha espasu atu kobra inklui iha Parlamentu Nasionál bainhira halo transmisaun direita, katak sira husu Parlamentu Nasionál atu selu.

“Tanba tuir CI nia haree,  tuir orgaun Estadu nian hetan apoiu finansa Estadu nian ne’e, responsabilidade RTTL atu halo transmisaun direita iha Parlamentu Nasionál, sein kustu. Tanba osan ita-nian no ba interese Nasionál hanesan 20 de maio, 30 de agostu inklui debate iha plenária,” nia dehan. 

Tanba empreza, nia hateten, lei fó dalan entaun RTTL iha opurturnidade no CI hanoin tenke iha esforsu atu re-ajusta pozisaun RTTL nian tuir konstituisaun 41 pontu 5 katak ne’e servisu públiku.

“Servisu públiku mak atu fornese informasaun ba públiku no ninia indikadór mak ba nivél Edukasaun no konesementu, nune’e públiku bele hetan informasaun ho loloos,” nia dehan.

Jornalista  : Osória Marques

Editór       :  Cancio Ximenes

HAKEREK NO HATÁN

Please enter your comment!
Please enter your name here