Aktividade traballadór sira ne’ebé halo servisu konstrusaun ba Ponte Comoro 3 iha área Fomento Comoro, Dili iha loron 17 maiu 2017. Imajen Tatoli/António Gonçalves

DILI, 24 juñu 2020 (TATOLI) – Governu liuhosi reuniaun Konsellu Ministru (KM) aprova Projetu Dekretu-Lei alterasaun dahuluk ba Dekretu-Lei númeru 16/2020 loron 30 abríl nian, kona-ba medida hodi fó apoiu ba empregu iha ámbitu pandemia COVID-19.

Ministru ba Prezidénsia Konsellu Ministru, Fidelis Manuel Leite Magalhães, informa Governu halo alterasaun ne’e tanba konsidera atividade ekonomia hahú rekupera no períodu kobertura sei ramata iha fulan-juñu, tanba ne’e kompromisu ne’ebé akontese tiha ona sei respeita maibé laiha estensaun hafoin fulan-juñu.

“Hafoin halo avaliasaun, fulan-juñu agora atividade ekonómika rekupera hikas kompara ho antes iha atividade barak tenke para,” tenik Ministru Fidelis hafoin reuniaun ezekutivu iha Palásiu Governu, kuarta ne’e.

Alterasaun dahuluk ne’e refere ba atribuisaun subsídiu porsentu 60 ba empreza ne’ebé ho objetivu atu apoia traballador sira, tamba Governu nota katak situasaun hahú di’ak loron ba loron.

“Iha planu sanitáriu, epidemolójiku, no planu ekonómika, neineik sei la’o normál filafali tanba ne’e konsidera katak la justifika ona atu fó nafatin apoiu temporáriu hafoin fulan-juñu, ne’ebé kria hosi Dekretu-Lei númeru 16/2020, 30 abríl,” dehan Ministru Koordenadór Asuntu Ekonómiku interinu subliña.

Apoiu hirak-ne’e sei aplika ba kontratu servisu hirak ne’ebé suspende ka redúz horas servisu husi períodu normál iha fulan marsu, abríl, maiu no juñu tinan 2020.

“Iha previzaun husi pakote ekonómiku aprezenta, totál pagamentu subsídiu porsentu 60 ba traballadór hamutuk millaun $14-resin, ba benefisiáriu pur volta 30.000”, nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here