Tribunál Distritál Dili. Imajen/TATOLI

DILI, 24 juñu 2020 (TATOLI) -Tribunál Distritál Dili (TDD) liuhosi julgamentu primeiru interrogatóriu aplika medida koasaun aprezentasaun periódika (AP) ba arguidu ho inisiál AB ne’ebé deskonfia lori sasán kro’at hanesan katana no tudik hodi ameasa vítima IK ho nia maluk ida.

Tuir kronolojia kazu ne’e akontese iha loron 21 juñu, foin lalais ne’e, tuku 17:00 Otl, iha area Comoro, Dili,  momentu ne’ebá vítima ho IK ho nia maluk ida maka bolu no hasai lia fuan aat ba arguidu AB no halo mós asaun agresaun fíziku, nune’e arguidu halai ba uma hodi foti tudik, katana ho double stick. Altura ne’ebá arguidu to’o fali iha fatin akontesimentu vítima sira la iha ona.

Juis singular, João Ribeiro, aplika medida koasaun aprezentasaun periódika ba arguidu tanba faktu ne’ebé aprezenta hosi Ministériu Públiku liuhosi Prokuradór Hipolito Exposto Martins Santa, la dun prienxe rekizitu. Tanba ne’e, Tribunál liberta arguidu hosi sela detensaun hodi hein prosesu investigasaun hosi Ministériu Públiku.

Defeza Humberto José Alves ne’ebé fó asisténsia legal ba arguidu klarifika katak desizaun Tribunál nian ne’e justu tanba haree ba sirkunstánsia sira momentu ne’ebá nia parte halo defeza ba nia-an maibé la’ós atu estraga ema ida.

Ministériu Públiku iha alegasaun solisita mós ba tribunál atu aplika aprezentasaun periódika ba arguidu. Mezmu haree ba sirkunstánsia hotu MP promove arguidu AB ho krime arma branka ne’ebé iha dekretu lei númeru 5/2017.

Jornalista       : Nelson de Sousa

Editór             : Francisco Simões

 

HAKEREK NO HATÁN

Please enter your comment!
Please enter your name here