Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos. Imajen Tatoli/Egas Cristovão

DILI, 23 juñu 2020 (TATOLI) – Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos informa, ekipa Task Force Ministériu Solidaridade Sosiál no Inkluzaun (MSSI) sei tun terrenu hodi atualiza informasaun molok halo pagamentu subsídiu uma-kain iha Rejiaun Administrativa Espesiál Oé-cusse Ambeno (RAEOA).

Tuir Berta, daudaun ne’e ekipa finaliza ona dadus, tanba ne’e iha fulan-jullu nia laran ekipa sei desloka bá Oé-cusse hodi halo pagamentu.

“Kona-ba pagamentu iha RAEOA ekipa Task Force sei tun uluk ba fó informasaun mak foin bele halo pagamentu tanba ne’e hahú loron 1 jullu ba leten bele ona halo pagamentu iha RAEOA,” hateten Vise PM, Armanda Berta, hafoin relata progresu servisu ba Primeiru-Ministru (PM), Taur Matan Ruak iha Palásiu Governu, tersa ne’e.

Governante ne’e informa, daudaun ne’e pagamentu subsídiu uma-kain iha munisípiu sira kuaze konklui ona no hein de’it Munisípiu Dili.

“Progresu pagamentu iha munisípiu kuaze remata ona no hein de’it husi Dili nian mak sei hela suku tolu hanesan Bebonuk, Bairro Pité no Comoro, maibé Bebonuk orsida finaliza ona enkuantu Bairro Pité no Comoro sei presiza tán loron rua hodi finaliza,” nia subliña.

Antes ne’e Vise PM ne’e deklara katak MSSI simu dadus uma-kain RAEOA nian husi Ministériu Administrasaun Estatál (MAE) hamutuk 23.000.

Tuir dadus hosi MSSI katak to’o iha segunda (22/06), pagamentu iha munisípiu 12 atinje ona porsentu 91, husi totál uma-kain 265.387 ne’ebé korresponde ho totál pagamentu hamutuk $53.077.400.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here