UN Rezidente Koordenadór iha Timor-Leste Roy Trivedy. Imajen/Tatoli Egas Cristovao

DILI, 23 juñu 2020 (TATOLI)–Koordenadór Rezidente Organizasaun Nasaun Unida (ONU) iha Timor-Leste, Roy Trivedy, hatete nia parte sei realiza enkontru iha semana oin atu relata progresu programa Spotlight ne’ebé mak lansa ona iha fulan marsu liubá ne’e.

Notísia Relevante: SEII-UN Women Asina MoU ba Implementasaun Programa Inisiativa Spotlight

Nia dehan, enkontru ne’e sei involve ajénsia lima (5) hanesan United Nations Development Programme (UNDP) UNICEF, United Nations Population Fund (UNFPA), Organizasaun Internasionál ba Traballadór (ILO) no mós Governu no Sosiedade Sivíl sira iha Timor-Leste.

“Ohin, ami enkontru kona-ba programa Spotlight nian ne’ebé mak foka liu atu hamenus violénsia kontra feto ho mós labarik feto. Tanba ne’e, mak ohin ami enkontru ho SEII no nia diretór sira atu realiza enkontru iha semana oin hodi ko’alia kona-ba programa Spotlight hamutuk ho UNDP, UNICEF, UNFPA, ILO, Governu no Sosiedade sivíl,” dehan Koordenadór Rezidente ONU iha Timor-Leste, Roy Trivedy, ba jornalista sira iha UN Caicoli, Dili, tersa ne’e. 

Semana oin, nia hateten, sira sei halo relatóriu kona-ba progresu programa Spotlight nian ba sidadaun sira. Tanba, tuir nia, iha situasaun VOVID-19 ne’e programa Spotlight muda hodi responde ba emerjénsia hanesan iha área violénsia doméstika ne’ebé mak afeta ba feto no labarik feto sira.

“Ho ida-nee, ami servisu hamutuk ho parte Polisia Nasionál Timor leste (PNTL) inklui ho Governu atu ajuda ba violénisa hasoru feto no labarik feto sira,”  nia dehan. 

Entretantu, Sekretária Estadu Igualdade no Inkluzaun (SEII), Maria José da Fonseca Monteiro de Jesus, hateten inisiativa programa Spotlight ne’e lansa tanba esforsu hosi Nasaun Unida (UN) atu nune’e hetan apoiu hosi Governu atu komplimenta esforsu Governu nian hodi kombate hasoru feto no labarik feto.

“Programa Spotlight ne’e, ita foka liu ba iha Munisípiu Bobonaro, Eremera no Viqueque,” nia hateten. 

Nia dehan, durante ne’e atividade programa Spotlight la la’o tanba kazu COVID-19, maibé semana oin bele anúnsia relatóriu Spotlight nian.

Notísia Relevante: Governu Sei Implementa Programa Inisiativa Eliminasaun Violénsia Kontra Feto

Jornalsita : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here