Padre Juvito do Rego de J. Araújo

DILI, 23 juñu 2020 (TATOLI)-Atu la bele iha interpretasaun sanak no la bele iha limitasaun ba Liberdade Imprensa ho Liberdade Espresaun, maka Governu liuhosi Ministériu Justisa (MJ) tenke halo definisaun loloos ho momoos ba ezbosu Lei Kriminaliza Difamasaun.

Notísia Relevante : Esbosu Lei Kriminaliza Difamasaun Labele “Viola” Prinsípiu Konstitusionál

Padre Juvito do Rego de Jesus Araújo nia entendimentu ba iha proposta ezbosu lei kriminaliza difamasaun no injure ne’ebé daudaun ne’e Ministériu Justisa prepara hodi husu paresér ba sosiedade sivíl, inklui igreja no entidade sira seluk tan, kuandu avansa ba oin, presiza iha definisaun klaru katak atu kriminaliza ida ne’ebé mak bele no ida ne’ebé mak labele, hanesan ba ema ne’ebé imorál ho nia aktu hanesan kria identidade falsu iha media sosiál hodi trata no tolok aat ema, inklui ko’alia aat lider nasionál sira ida ne’e mak tenke kriminaliza.

Saserdote ne’e lia-tun, kritika sira ne’ebé ho faktu no konstrutivu inklui hanesan jornalista halo notísia ho faktu kona-ba ukun na’in ne’e halo korrupsaun fó sai notísia ne’e la’ós kriminaliza.

“Tuir ha’u nia opiniaun pesoál atu halo lei kriminaliza difamasaun presiza iha definisaun klara atu labele teri netik liberdade imprensa no liberdade espresaun,” hateten Padre Jovito Rego de Jesus Araujo, hodi responde Ajénsia Tatoli, ohin, iha Kamara Dioseze Dili.

Nia  husu atu Ministériu Justisa halo lei defende interese komún ba ema hotu hosi ki’ik to’o boot no la’ós atu próteze ukun nain-sira de’it.

“Ba ha’u konkorda ho lei ne’ebé Governu atu halo, maibé kriasaun lei ida tenke garante protesaun ba ema hotu,” hateten Padre Juvito.

Amu Juvito do Rego,  hateten lei ne’e nia finalidade atu próteze no eduka sosiedade moris tuir Maromak nia doutrina, atu respeita ema ida-idak nia dignidade, labele hatete aat malu tanba Jesus mate iha krús atu soi ema.

“Ohin loron ita triste tanba ema imorál komportamentu ko’alia at malu, nune’e ho lei atu regula, tanba ne’e ema sarani tenke iha karidade ba malu hodi hadomi malu moris tuir Jesus,” Amu Juvito hatutan.

Daudaun iha artigu 340 iha kódigu sivíl kuandu sidadaun ida sente katak nia vida privada, reputasaun  no onra ne’e ema viola bele hatama asaun sivíl tuir dalan legal. Tanba ne’e, la presiza kria tan lei kriminaliza difamasaun. Ba ida-ne’e,  Amu Juvito hateten prosesu sivíl to’o agora la funsiona ho di’ak tanba ema sira sente desprotezidu dimafadu publikamente iha mídia sosiál la hetan protesaun.

“Ha’u hanoin ita presiza haree mekanizmu. Ida uza la serve katak mekanizmu ne’e ladi’ak, tenke uza mekanizmu seluk hodi lei tenke funsiona ho di’ak, nune’e eduka ema,’’ Amu Juvito Rego de Jesus Araujo hatete.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here