Ambiente iha sala plenáriu Parlamentu Nasionál. Imajen Tatoli/Egas Cristovão

DILI, 23 juñu 2020 (TATOLI) – Parlamentu Nasionál (PN) aprova ona proposta elimina orsamentu $500.000 ne’ebé prevee ba dezenvolve polítika no programa iha ámbitu prevensaun no kombate surtu COVID-19, ho rezultadu votu  a-favór 61, Kontra 0 no absetasaun ida.

“Ho nune’e, proposta númeru 1 pasa, alterasaun artigu 1 konta únika Orsamentu Jerál Estadu ne’ebé elimina Orsamentu $500.000,” tenik Prezidente Parlamentu Nasionál (PPN), Aniceto Guterres, hafoin anúnsia rezultadu votasaun, iha ámbitu diskusaun no votasaun iha espesialidade no final globáll husi Proposta Lei 17/V(2ª) kona-ba realizasaun transferénsia estraordinária daruak husi Fundu Petrolíferu durante tinan 2020 no alterasaun dahuluk ba Lei númeru 2/2020, loron 6 abríl, iha sala plénariu PN, tersa ne’e.

Deputada proponente no Prezidente Komisaun C ne’ebé trata asuntu Finansa Públiku, Maria Angélica Rangel, hateten to’o oras ne’e orsamentu $500.000 ne’e parlamentu seidauk ezekuta.

“Ami propoin atu halo alterasaun atubele haruka orsamentu $500.000 ne’e ba kaixa tezouru, la’ós iha Parlamentu Nasionál,” atuál Deputada Bankada Fretilín argumenta.

Deputada Proponente husi Bankada CNRT, Fernanda Lay, rekoñese maski orsamentu ne’e PN aprova ona, maibé haree ba nesesidade laiha atu ezekuta, tanba ne’e propoin atu elemina.

“Ami halo Proposta ne’e ho objetivu atu orsamentu $500.000 iha levantementu Fundu Petrolíferu dahuluk ne’ebé la uza ona, di’ak liu halo alterasaun hodi uza atu reforsa kaixa tezouru no Fundu COVID-19. Ho aterasaun ne’e ha’u espera Parlamentu sei la husu tan osan,” nia akresenta.

Iha sorin seluk, Deputadu Bankada KHUNTO, Luís Roberto, orsamentu $500.000 ne’e maiória deputadu aprova atu halo nia funsaun no papél ba fiskalizasaun atuvidade iha ámbitu COVID-19, maibé PN haree laiha nesesidade.

“Ha’u konkorda ho maluk proponente sira atu fó filafali osan ne’e ba Fundu COVID-19 atubele hala’o atendimentu ba ita-nia ema sira no hala’o servisu ba hodi halo prevensaun ba COVID-19,” tenik atuál atuál Vise PPN.

Nune’e mós, Prezidente Bankada CNRT, Duarte Nunes, konsidera eliminasaun orsamentu ne’e laiha problema tanba osan ne’e rasik seidauk konsege ezekuta.

“Osan ita seidauk uza no Fundu COVID-19 sei presiza reforsa hodi finansia programa ne’ebé Governu aprova ona iha Konsellu aministru, entaun entaun lori ba fali tanba momentu iha ne’ebá ita presiza maibé agora ita la presiza ona bele lori filafali,” nia afirma.

Prezidente Bankada PD, António Conceição, hateten atu elimina orsamentu ne’e presiza haree didi’ak tanba orsamentu $500.000 seidauk uza no kontinua iha Fundu COVID-19 no pandemia globál ne’e presiza Estadu tomak nia esforsu ba prevensaun.

“Iha nesesidade atu Parlamentu uza karik bele uza tanba ho razaun atu Estadu tomak bele servisu kontribui hodi prevene COVID-19, tanba osan ne’e la fahe ba deputadu sira,” nia argumenta.

Ministru Finansa, Fernando Hanjam, dehan parte Governu konkorda proposta eliminasaun ne’e, maibé depende ba Deputadu sira atu foti desizaun.

“Ami konkorda ho saida mak deputadu sira propoin mai,” Governante ne’e afirma.

Iha loron 2 abríl PN aprova pedidu levantamentu estraordinária dahuluk ba Fundu Petrolíferu no iha loron 6 abríl Prezidente Repúblika, Francisco Guterres ‘Lú Olo’ promulga ona Dekretu Parlamentu Nasionál númeru 14/V, kona-ba autorizasaun ba realizasaun transferénsia estraordinária husi Fundu Petrolíferu ho montante millaun $ 250.

Husi totál orsamentu millaun $250 ne’ebé aprovadu, millaun $150 aloka ba finansiamentu medida prevensaun no kombate moras COVID-19 iha ámbitu Fundu COVID-19, millaun $100 ba konta jerál tezouru no husi millaun $150 ne’e, aloka $500.000 ba PN atu dezenvolve polítika no programa iha ámbitu prevensaun no kombate surtu COVID-19.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here