Reprezentante OMS, Rajesh Pandev, Entrega Apoiu Ai-moruk ho Ekipamentu Saude, ba MInistra Saude Odete Maria Freitas Belo. Imajen/Felicidade Ximenes

DILI, 22 juñu 2020 (TATOLI)-Organizasaun Mundiál Saúde (OMS), ho Programa Ai-han Mundiál (WFP-sigla inglés) ohin entrega apoiu ai-moruk item 50 ba moras la hada’et no ekipamentu seluk tan ba Ministériu Saúde.

Apoiu oferese husi Reprezentante OMS iha Timor-Leste, Rajesh Pandev, ba Ministra Saúde, Odete Maria Freitas Belo, iha armazen SAMES, Kampung-Alor Dili.

“Aimoruk ne’ebé mak ita-nia parseiru sira fó ne’e mak ba moras la hada’et nian mak hanesan moras kurasaun, diabetes, pulmaun no seluk tan entaun ai-moruk sira ne’e mak iha item 50 maibé, la’ós ai-moruk de’it iha mós ekipamentu médiku nian hanesan tensemeter, termometer,  lucumeter no mós ai-moruk ipertensaun ba inan isin-rua nian,”informa Ministra Saúde, Odete Maria Freitas Belo.

Governante ne’e dehan ho apoiu husi Organizasaun Internasionál rua ne’e sei tulun Ministériu Saúde atu atende pasiente  moras la hada’et sira ho lalais.

Iha fatin hanesan,Reprezentante OMS, Rajesh Pandev, relata OMS gastu orsamentu millaun $ 1 hodi sosa ai-moruk no ekipamentu ne’e.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here