Prezidente Onoráriu Asosiasaun TANE Konsumidór, José Ramos Horta dada-lia ho jornalista sira hafoin enkontru ho Prezidente TANE Konsumidór, António Ramos da Silva ‘Naikoli’, iha edifísiu Eis Titulár, Farol, tersa (23/06). Imajen/TANE

DILI, 23 juñu 2020 (TATOLI) – Prezidente Onoráriu Asosiasaun TANE Konsumidór, José Ramos Horta husu ba públiku atu tau importánsia ba servisu advokasia TANE Konsumidór tanba asosiasaun ne’e mai ho objetivu atu halo avokasia ba konsumidór sira iha Timor-Leste.

“Ha’u rasik akompaña servisu ne’ebé TANE halo durante ne’e, ema balun hanoin katak TANE la importante maibé ha’u hanoin ita hotu tenke manan konsiénsia ba servisu asosiasaun ne’e tanba defende kualidade servisu ne’ebé setór privadu no públiku fó ba konsumidór,” dehan Horta iha edifísiu Eis Titulár, Farol, tersa ne’e.

Premiadu Nobel da Paz ne’e nota katak durante ne’e iha Timor-Leste laiha protesaun didi’ak ba direitu konsumidór sira no bele prejudika ba ema-nia vida.

“Esperiénsia durante ne’e hatudu iha Timór laran laiha protesaun didi’ak ba komumidór sira no dala ruma bele kusta ba ema-nia vida, saúde, no mós lori impaktu boot ba nasaun tomak. Signifika bainhira ita-nia Governu no setór privadu la servisu hamutuk hodi haree prestasaun servisu kualidade ba públiku maka bele afeta ba imajen Timór nian nu’udar rai ida ba turizmu ka investimentu,” nia akresenta.

Eis Prezidente Repúblika ne’e sempre akompaña servisu Asosiasaun Defeza Konsumidór, ne’ebé maski foin hahú maibé bele kontribui servisu no hanoin di’ak, liuliu iha tempu krize surtu COVID-19, ne’ebé presiza tau atensaun liu tanba sei iha problema barak.

“Ha’u sempre akompaña, ha’u hanoin sira tenke atensaun liután tanba iha problema barak ne’ebé Estadu rasik maka tenke responsabiliza. Ezemplu hanesan kosumidór eletrisidade, bainhira sasán elektróniku ida a’at sé maka atu responsabiliza? agora pelus menus iha ona asosiasaun ida hodi bele haree problema konsumidór sira,” nia subliña.

TANE hakarak luta nafatin hodi defende direitu  konsumidór timor-oan sira nia.

“TANE nia prekupasaun maka tanba sá folin kombustível iha Timór ne’e sei a’as tebes enkuantu ita-nia mina iha Tasi Timór husi Bayu-Undan fa’an ba merkadu internasinál ho folin tun loos, tanba ne’e mak TANE harii hodi defende konsumidór nia direitu,” nia tenik.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here