Embaixadór Austrália iha Timor-Leste, Peter Roberts hasoru malu ho Primeiru-Ministru, Taur Matan Ruak, iha Palásiu Governu, Tersa (23/06). Imajen Tatoli/Egas Cristovão

DILI, 23 juñu 2020 (TATOLI) – Governu Austrália liuhosi Embaixada iha Timor-Leste kompromete katak kontinua apoia timor-oan sira ne’ebé serbisu iha Austrália liuhosi programa Seasonal Worker.

“Austrália prontu apoia nafatin traballadór timor-oan sira maibé depende ba situasaun COVID-19, tanba daudaun ne’e mós Timor-Leste sei implementa Estadu Emerjénsia nune’e mós Austrália rasik,” dehan Embaixadór Austrália iha Timor-Leste, Peter Roberts hafoin hasoru malu ho Primeiru-Ministru, Taur Matan Ruak iha Palásiu Governu, tersa ne’e.

Diplomata australiana ne’e informa, daudaun ne’e traballadór timor-oan hamutuk 1.100 maka servisu iha Austrália no sira bele asesu sistema saúde.

Maski nune’e, traballadór timor-oan iha Austrália hamutuk na’in-30 maka kontratu ramata ona maibé seidauk bele fila tanba aeroportu taka hotu.

Tuir dadus husi Sekretaria Estadu ba Formasaun Profisionál no Empregu (SEFOPE) husi tinan 2014 to’o 2018, timor-oan hamutuk 2.819 maka servisu ona iha Austrália liuhosi programa Seasonal Worker iha área ospitalidade no ortikultura no konsege rekolla retornu milliaun $9.698.579,15 mai Timor-Leste.

Iha tinan 2012 traballadór hamutuk 12, tinan 2013 traballadór na’in-36, 2014 ema na’in-131, 2015 na’in-181, 2016 iha traballadór na’in-298, 2017 na’in-782, 2018 ema na’in-1.380 no 2019 ema lima.

Iha área ortikultura traballadór mane hamutuk na’in-1.823 no feto 744, enkuantu iha ospitalidade mane 187 no feto 95, ne’ebé husi númeru ne’e traballadór balun servisu repetidu to’o dala haat hafoin kompleta servisu ho durasaun fulan-neen, bazea ba prestasaun servisu traballadór iha kompañia sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here