Mikrolete iha Kapitál Dili. Imajen Tatoli/António Gonçalves

DILI, 24 juñu 2020 (TATOLI) – Governu liuhosi reuniaun Konsellu Ministru (KM) aprova Projetu Rezolusaun Governu, ne’ebé aprezenta hosi Ministru Transporte no Komunikasaun, José Agustinho da Silva, kona-ba Polítika no Programa ba Transporte sira.

“Polítika ba setór transporte nia objetivu maka hadi’ak liután kapasidade, abilidade no afektasaun ba rekursu sira”, relata Ministru ba Prezidénsia Konsellu Ministru, Fidelis Manuel Leite Magalhães hafoin reuniaun KM iha Palásiu Governu, kuarta ne’e.

Projetu rezolusaun ne’e kaer ba objetivu hirak ne’ebé define ona iha Planu Estratéjiku Dezenvolvimentu 2011-2030 nian no Objetivu Dezenvolvimentu Estratéjiku Governu nian.

Ministru Koordenador Asuntu Ekonómiku interinu ne’e esplika, diploma ne’e atu hadi’ak liután kuadru legál sira hodi bele hatán ba nesesidade sistema transporte ne’ebé modernu, fasilita no apoia hodi halo operasaun ida efisiente atu reforsa no hakbiit dezenvolvimentu sósiu-ekonómiku no hadi’ak liután regulamentu operasionál no ba jestaun ba sistema transporte sira.

Bazeia ba programa Governu, sirkulasaun ema ho beins hanesan faktór fundamentál ida atu impulsiona kreximentu ekonómiku no dezenvolvimentu armoniozu iha territóriu Nasionál tomak.

Programa Governu kona-ba sektór transporte sei kumpre objetivu hanesan haree di’ak fali lejislzlasaun kona-ba Kódigu Estrada no kria trasnporte públiku terrestre ho tarifa ne’ebé bele benefisia povu tomak.

Regulamenta sektór transporte privadu, hanesan taxi, hodi hadi’a no aumenta sinál tránzitu iha territóriu nasionál atu prevene dezastre no insentiva espansaun rede trasnporte karga ba zona rurál atu apoia agrikultór no sektór seluk iha komersializasaun produtu agríkola no sasán seluk tán.

Iha área transporte terrestre, sei harii postu atendimentu iha munisípiu atu promove servisus inspesaun, rejistu veíkulu no fó lisensa inklui karta kondusaun.

Kona-ba transporte marítima, sei haree di’ak fali regulamentasaun ba atividade portuária, konstrusaun Portu Baía Tibar, ne’ebé halo kooperasaun ho Governu Alemaun inklui mós planu estudu viabilidade atu halo portu komersiál ida iha fatin ne’e hotu.

Kona-ba transporte aéreu, sei halo regulamentasaun atividade aeroportuária no konstrusaun aeroportu doméstiku iha Same, Suai, Maliana no Oé-cusse inklui revitalizasaun aeroportu Baucau.

Nune’e mós sei implementasaun sistema kontrolu adekuadu ida ba ekipamentu no viatura Estadu nian no halo manutensaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here