Logotipu Tribunál Distritál

DILI, 23 juñu 2020 (TATOLI)-“Konfia to’o Kungfu malu.” Talvés palavra klásiku ne’e natoon bele saran ba kazu abuzu konfiansa agravadu ne’ebé, ohin, julga iha Tribunál Distritál Dili.

Oinsá lae? Tuir faktu ne’ebé aprezenta hosi Ministériu Públiku iha auzénsia julgamentu ne’e katak iha tinan 2012, lezadu LKT nu’udar proprietáriu ba karreta marka Pajero ho númeru matríkula 24-927, tuir akordu eskritu mak iha lezadu reprezenta kompañia Three Star Rental, fó rental nia karreta refere ho karreta sira seluk ba arguidu HTDCM aluga hodi hala’o servisu projetu iha Oe-Cusse.

Iha loron 05 dezembru 2013, arguidu  HTDCM ba aluga karreta ho marka Pajero númeru matríkula 25-152 TLS, através hosi testemuña ho inisiál GDC entrega depózitu ho valór $500 ba lezadu  LKT  tanba karreta refere atu hala’o servisu projetu nian iha Oe-Cusse.

 Iha 19 dezembru 2013, arguidu haruka sasin GDC ba aluga tan karreta marka Mitsubishi Pajero ho númeru matríkula 25-256, maibé momentu ne’ebá arguidu la fó osan depózitu ruma ba karreta nian, tanba iha konfiansa mak lezadu entrega karreta ba sasin GDC hodi lori karreta hala’o nafatin servisu projetu nian iha Oe-Cusse.

Iha loron mak la lembra ona ,maibé iha fulan fevereiru 2014, arguidu ho membru PNTL ida inisiál  FDCGP ba hasoru lezadu hodi promote katak arguidu atu selu osan kona-ba aluga karreta rua nian iha fulan jullu 2014. Iha loron ne’e arguidu husu tan lezadu katak arguidu atu foti tan karreta ida no loron ne’e kedas lezadu mós entrega karta marka mitsubishi Pajero ho númeru matríkula 25-104 ba arguidu.

Tuir deklarasaun hosi arguidu no sasin nain-rua GDC ho membru PNTL ho inisiál FDCGP, iha  jullu 2014, lezadu telefone ba arguidu hodi konfirma kona-ba pagamentu alugér karreta nian, maibé arguidu promote ba lezadu atu selu iha fulan novembru 2014.

Molok ne’e, iha tan loron 4 setembru 2014, tuku 10:00 Otl arguidu ho FDCGP ba fali lezadu nia uma hodi husu tan karreta ida lezadu mós autoriza hodi entrega duni karreta nafatin marka Mitsubishi Pajero ho númeru matríkula 24-927 TLS.
Bainhira to’o iha outubru 2014, lezadu telefone ba arguidu kona-ba pagamentu alugér karreta, arguidu ho sasin FDCGP ba hasoru lezadu hato’o katak osan sei sai iha  novembru mak foin arguidu pasa hela osan check ba lezadu ho valór $84,000,00 katak check refere ne’ebé osan ne’e sei sai ativu iha fulan novembru 2014, momentu ne’ebá lezadu mós haree tiha check ne’e.

Iha loron 10 novembru 2014, arguidu ba hasoru lezadu hodi hatete katak nia parte seidauk iha osan, maibé prontu atu halo akordu ida ho lezadu atu prolonga tan tempu ba fulan ida. Iha akordu ne’e arguidu promete sei selu jurus 5% ba lezadu bainhira liu fulan ne’ebé termina.

Kuandu  to’o loron atu selu, arguidu la entrega osan tuir akordu, maibé lezadu konsege foti fali nia karreta tolu ho marka Mitsubishi Pajero ho númeru matríkula 25-152,25-256 ho 25-104 no ida marka Mitsubishi ho matríkula 24-927 arguidu la entrega ba lezadu ikus mai rona katak arguidu fa’an tiha ona ba ema seluk.

Arguidu rasik mak hakarak halo ho forma livre, ho komportamentu hakerek iha aktu ne’e hodi ema seluk sai ofendidu ho propózitu konkretiza nia hahalok hodi abuza lezadu nia konfiansa ne’ebé fó ba arguidu, mezmu nia hatete katak hahalok ne’e lei proibe maibé nia halo nafatin.

Ba kazu ne’e, Ministériu Públiku promove arguidu HTDCM hanesan autór materiál ho forma konsumada pratika krime ida abuza konfiansa agravadu, prevista no punidu tuir artigu 257 iha kódigu penal Timor-Leste ne’ebé hateten kuandu koiza movel ne’e nia valór aas-liu $1.000 ajente sei hetan pena prizaun tinan-rua (2) to’o tinan-ualu (80).

Hatán ba akuzasaun hirak ne’e lezadu ho inisiál LKT deklara ba Tribunál katak akuzasaun hosi MP nian ne’e loos hotu.
Tanba nia konsidera iha prosesu sira ho arguidu nia parte sai vítima nune’e hodi hato’o keixa ba parte justisa hodi hare tuir lei ne’ebé iha.

Nia dehan, momentu ne’ebá nia parte halo konkordánsia ho arguidu atu alugér kada karreta loron ida selu ho kustu $90,00 tanba nia iha konfiansa tomak nune’e deside alugér karreta refere ba arguidu hodi utiliza hala’o ba nesesidade servisu, maibé ikus mai mosu oin-seluk.

Hafoin rona tiha deklarasaun lezadu nian, Tribunál liuhusi juiz koletivu deside hodi adia fila-fali julgamentu ne’e ba iha loron 14 jullu, tinan ne’,e iha tuku 11:00 Otl, hodi kontinua rona testemuña sira seluk.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here