Prezidente Asosiasaun Tane Konsumidór, António Ramos da Silva ‘Naikoli’. Imajen Tatoli/Nelson de Sousa

DILI, 23 juñu 2020 (TATOLI) – Prezidente TANE Konsumidór, António Ramos da Silva ‘Naikoli’ hasoru malu ho Prezidente Onoráriu TANE Konsumidór, José Ramos Horta, hodi relata serbisu durante implementasaun Estadu Emerjénsia (EE) iha fulan-tolu nia laran.

“Ohin ami mai relata ba Dr.Ramos Horta, nu’udar Prezidente Onoráriu TANE Konsumidór, kona-ba servisu ne’ebé TANE halo durante Estadu Emerjénsia. Ami hili servisu advokasia ba servisu públiku esensiál tolu maka hanesan telekomunikasaun, enerjia eletrisidade no folin mina,” tenik Prezidente TANE Konsumidór iha edifísiu Eis Titulár, Farol, tersa ne’e.

Durante EE, Asosiasaun Defeza Konsumidór ne’e halo avaliasaun ba kada pontu iha medida ne’ebé Governu foti iha servisu públiku esensiál ne’ebé la kontempla iha medida hanesan telekomunikasaun.

“Iha situasaun Estadu Emerjénsia durante fulan-tolu nia laran ne’e, servisu telekomunikasaun kuaze ema hotu uza iha serbisu no estuda, enkuantu servisu telekomunikasaun ne’e la kontempla iha medida husi Governu. Durante ne’e ami halo apelu barak atu haree mós ba iha subsidiár,” nia dehan.

Nune’e mós, kona-ba servisu Eletricidade de Timor-Leste (EDTL), Dirijente asosiasaun ne’e konsidera Governu fó subsídiu ba kliente EDTL maibé parte seluk ahi kontinua mate nafatin.

“Ida-ne’e prejudika konsumidór sira tanba ahi mate hela de’it bele estraga sasán eletróniku sira. Tanba kestaun ne’e iha asesu universál ne’ebé ema hotu asesu ba ahi maibé parte seluk laiha ninia kontinuidade, laiha jestaun no manutensaun di’ak no mós jestaun ba rekursu umanu, tanba ne’e mak ami sempre apelu nafatin,” nia subliña.

Nia refere mós kona-ba mina gazoel ne’ebé daudaun folin a’as iha merkadu, la reflete ba krize ne’ebé agora mundu tomak hasoru.

“Folin mina la reflete ba krize ne’ebé mundu hasoru tanba estasaun gazolina sira iha Dili laran ninia kustu sa’e nafatin, tanba ne’e ami tenke husu ba entidade reguladór atubele haree maski merkadu ne’e livre maibé iha situasaun krize Estadu tenke halo intervensaun,” nia akresenta.

Liuhosi projetu ‘Hakbiit no Kapasita Konsumidór sira iha Timor-Leste, ne’ebé finansia husi União Europeia no implementa hosi TANE ho apoiu DECO (Portugal) nian, asosiasaun ne’e hahú promove programa edukasaun sívika ba konsimidór liuhosi pájina facebook, kona-ba protesaun ekonómika ba konsumidór ho fornesedór sira, nune’e bainhira EDTL mai monta pre-pagu iha konsumidór nia uma, TANE eziji presiza iha konkordánsia entre formesedór no konsumidór kona-ba protesaun konsumidór no protesaun interese ekonómiku.

“Ami halo serbisu oinsá mak tenke estabelese servisu karta reklamasaun iha komersiál sira, nune’e bainhira konsumidór sira la satisfeitu servisu ne’ebé iha, nia bele hato’o keixa. Ida-ne’e parte ida edukasaun ba konsumidór,” nia realsa.

Ba kestaun ne’e, asosiasaun ne’e iha ona protokollu balun liuhosi meius komunikasaun sosiál atu sai hanesan matadalan ne’ebé di’ak hodi eduka konsumidór sira no mós proteje ba interese ekonomia Estadu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here