Embaixadór Austrália iha Timor-Leste, Peter Roberts. Imajen/Egas Cristovão

DILI, 23 juñu 2020 (TATOLI) – Embaixadór Austrália iha Timor-Leste, Peter Roberts, hateten Austrália prontu apoia Timor-Leste dezenvolve ekonomia rai-laran ne’ebé hetan impaktu husi surtu COVID-19, aleinde apoiu iha área saúde.

“Ami kontinua servisu hamutuk iha área saúde maibé mós ami hakarak foka ba ekonomia tanba ne’e maka iha fulan-juñu nia laran, Austrália apoia ona Programa Nasionál Dezenvolvimentu Suku (PNDS),” hateten Embaixadór ne’e hafoin hasoru malu ho Primeiru-Ministru, Taur Matan Ruak iha Palásiu Governu, tersa ne’e.

Diplomata ne’e afirma, Austrália mós hakarak apoia Timor-Leste iha área agrikultura no estrada rurál.

“Austrália iha programa sira hodi kontra impaktu ekonomia ne’ebé afeta husi Coronavírus,” nia akresenta.

Foin lalais ne’e, Embaixadór Peter Roberts asina nota kooperasaun ho Vise-Ministra Finansa, Sara Lobo Brites, hodi entrega apoiu orsamentu millaun $ 4,6 ba PNDS, nune’e suku 150 iha territóriu maka sei sai benefisiáriu husi apoiu ne’e hodi harii infraestrutura bázika hanesan irigasaun, bee moos, klínika no seluk tan.

Aleinde ne’e, Governu Austrália sei fó apoia subvensaun ho montante millaun AU$7 ba Governu Timor-Leste hodi halo rekuperasaun ekonomia durante pandemia COVID-19.

Nune’e mós, iha ámbitu luta kontrra COVID-19, Austrália fó ona ekipamentu protesaun saúde inklui kontribui espesialista laboratóriu husi Menzies School Austrália hodi apoiu médiku sira iha Laboratóriu Nasionál Hospitál Nacional Guido Valadares (HNGV) atu halo teste ba kazu Coronavírus.

Iha tinan 2019, Governu Timor-Leste asina ona akordu ho parseiru dezenvolvimentu liuhosi Governu Austrália hodi apoiu millaun AU$25 hodi finansia asisténsia tékniku liuhosi International Labour Organization (ILO).

Akordu ne’e mensiona, Governu Timor-Leste kada tinan tau orsamentu millaun $21 atu konstrui estrada rurál iha territóriu Timor-Leste hodi atinje trajetu kada tinan kilómetru 400 to’o 500.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here