Embaixadór Austrália iha Timor-Leste, Peter Roberts. Imajen Tatoli/Egas Cristovão

DILI, 23 juñu 2020 (TATOLI) – Governu Austrália liuhosi Embaixadór Austrália iha Timor-Leste, Peter Roberts kongratula Timor-Leste tanba susesu kombate surtu COVID-19.

Diplomata ne’e hato’o apresiasaun hafoin hasoru malu ho Primeiru-Ministru (PM), Taur Matan Ruak iha Palásiu Governu, tersa ne’e.

“Ha’u kontente tebes tanba bele hasoru malu ho Primeiru-Ministru ohin loron. Ha’u hato’o parabéns ba Timor-Leste tanba bele kombate krize Coronavírus ho di’ak no ha’u mós orgullu tebes tanba Austrália bele serbisu hamutuk ho Timor-Leste iha luta importante ne’e,” tenik Embaixadór Peter Roberts.

Diplomata australianu ne’e nota, daudaun ne’e kooperasaun entre Austrália no Timor-Leste di’ak liután tanba hanesan nasaun viziñu no sempre enfrenta dezafíu hamutuk.

“Ha’u mós informa ba Primeiru-Ministru katak Austrália prontu servisu hamutuk ho Timor-Leste kona-ba vijilánsia kontra Coronavírus no mós iha área dezenvolve ekonomia. Austrália kontente tebes tanba bele servisu hamutuk durante implementasaun Estadu Emerjénsia,” dehan Peter Roberts.

Embaixadór ne’e relata, durante prevensaun surtu COVID-19 iha Timor-Leste, ekipa husi embaixada, Polísia no Forsa australianu nafatin hela iha Timor-Leste hodi servisu hamutuk ho Ministériu Saúde no Sentru Integradu Jestaun Krize (CIGC, sigla portugés) hodi nafatin halo vijilánsia saúde nune’e bele luta kontra surtu ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here