Prezidente ACCCTO iha Timor-Leste, Kathleen Gonçalves hala’o konferensia Impresa hodi kondena liafuan Deputada Olinda Guterres hasoru Deputada Fernanda Lay. Imajen Tatoli/Eugênio Pereirra

DILI, 23 juñu 2020 (TATOLI) – Prezidente Asosiasaun Komersiál Komunidade Xineza (ACCCTO, sigla Portugés) iha Timor-Leste, Kathleen Gonçalves, hateten komunidade xineza iha Timor-Leste hato’o prostesta no kondena maka’as Deputadu Olinda Guterres nia liafuan hasoru Deputada Bankada CNRT, Fernanda Lay durante sesaun plenária foin lalais, tanba diskrimina ona komunidade xineza iha Timor-Leste.

“Deputada Olinda Guterres uza liafuan ‘Xina Pirata’, ami husi komunidade xineza timor-oan sente ofendidu tebes ho liafuan ne’ebé Deputada husi Bankada KHUNTO uza. Ami Konsidera diskriminasaun no ofensiva hasoru Deputada Fernanda Lay no komunidade xineza iha Timor-Leste,” tenik Prezidente ACCCTO liuhosi konferénsia imprensa, tersa ne’e.

Nune’e, asosiasaun ne’e husu ba Prezidente Parlamentu Nasionál atu hola medida tuir Rejimentu Parlamentu Nasionál hodi investiga Deputada Olinda Guterres.

ACCCTO mós husu labele halo diskriminasaun ba komunidade xineza timor-oan tanba sira mós fó kontirbuisaun dezde administrasaun portugés no luta ba ukun rasik-an, inklui dezenvolvimentu ekonómiku ba Timor-Leste.

“Komunidade xineza timor-oan mós fó kontribuisaun ba ita-nia luta libertasaun no membru balun maka fakar sira-nia ran no fó sira-nia vida hodi ohin loron ita bele ukun-an,” nia akresenta.

Liderasan ACCCTO ne’e mós husu ba Prezidente Partidu KHUNTO, Armanda Berta no Konsileiru Prinsipál, José Naimori atu hasai Deputada Olinda Guterres nu’udar membru Parlamentu Nasionál.

Iha sorin seluk, Reprezentante Juventude ACCCTO, Roger Freitas, konsidera liafuan Deputada Bankada KHUNTO ne’e diskrimina tebes komunidade xineza.

“Ami komunidade xineza iha Timor-Leste faz parte ba sidadaun timor-oan tanba ami mós kontribui ba luta liberatasaun nasionál,” nia afirma.

Ho nune’e, nia husu ba reprezentante povu iha Parlamentu Nasionál atu labele hamosu liafuan diskriminasaun tanba la eduka povu.

“Timor Leste atu ba oin ita presiza hamutuk no labele haree ba ras, kór no suku. Tanba ne’e ami husu labele repete tan liafuan sira ne’e tanba la eduka povu atu hamutuk dezenvolve nasaun ne’e,” nia subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here