Komandante Polísia Munisípiu Dili, Superintendente Xefe, Armando Monteiro. Imajen/Eugénio Pereira

DILI, 22 juñu 2020 (TATOLI)- Komandu Polísia Munisípiu Dili (KMD), sábadu madrugada, foin lalais ne’e, kaer no detein Xinés na’in-rua (2) ne’ebé tenta halo agresaun fíziku ka “baku” Komandante Polísia Munisípiu Dili, Superintendente Xefe Armando Monteiro.

Kronolojia husi kazu ne’e, Superintendente Xefe Armando Monteiro, informa, tanba Xinés  na’in-rua ho inisiál HQ no ZJ ne’ebé uza karreta  Land Cruiser Prado Kór mutin ho númeru matrikula HHH 9999 viola sinais tránzitu iha área Komandu F-FDTL, Fatuhada, Dili, ho kondisaun lanu no velosidade.

Altura ne’ebá, Superintendente Armando Monteiro, haktuir, nia parte ho membru Polísia balun lori karreta tenta halo atuasaun, maibé Xinés na’in-rua ho karreta kontinua halai, ikus mai sira para karreta no Xinés ho inisiál HQ tun husi karreta tenta baku komandante, maibé tanba komandante uza hela ropa polísia, ikus mai Xinés na’in-rua ne’e entrega aan ba polísia.

“Ita nia sidadaun Xineza na’in-rua  (HQ no ZJ) ho kondisaun lanu tanba konsumu alkóliku no lori karreta velosidade bele epizódika ema seluk nia vida iha estrada, tanba ne’e ami duni tuir ba kaer iha área Kampu Alor, Marconi,” dehan Komandante Armando Monteiro, ohin, ba jornalista  liuhosi konferénsia imprensa iha Komandu PNTL, Caicoli, Dili.

Sidadaun rua-ne’e agora detein hela iha sela detensaun polísia hodi hein prosesu tuir mai tanba deskonfia viola lei kódigu estrada, no kontra autoridade seguransa durante halo atuasaun.

Iha tempu besik, Komandu PNTL sei entrega Xinés na’in-rua ne’e ba Ministériu Públiku hodi prosesa tuir lei.

Jornalista   : Eugénio Pereira

Editór        : Francisco Simões

1 KOMENTÁRIU

  1. Agora sei tenta atu bake de’it Komndante Munisipiu Dili nian, fulan oin bele ba ona Komandante Jeral no fulan balun mai tan bele ona ameasa Ministru sira to’o PM no PR. Hahahah

HAKEREK NO HATÁN

Please enter your comment!
Please enter your name here