Prezidente Administrasaun Conselho dos Combatentes de Libertação Nacional (CCLN-sigla Portugés), Vidál de Jesus ‘Riak Leman’. Imajen/Mídia PR.

DILI, 22 juñu 2020 (TATAOLI)–Prezidente Administrasaun Conselho dos Combatentes de Libertação Nacional (CCLN-sigla Portugés), Vidál de Jesus ‘Riak Leman’ hateten, Prezidente Repúblika (PR), Francisco Guterres Lú Olo, sei informa ba Xefe Governu, Taur Matan Ruak, atu foti desizaun definitivu ba CCLN nia edifísiu hodi bele halibur veteranu sira, nune’e bele hala’o sira-nia programa.

Prezidente Administrasaun CCLN, hato’o asuntu ne’e ba jornalista sira, hafoin hamutuk no ninia estrutura, aprezenta preokupasaun ne’e ba Xefe Estadu iha palásiu Prezidente Bairru Pité, Dili.

“Prezidente Repúblika preokupa Kona-ba fatin no sei ko’alia ho Primeiru-Ministru, Taur Matan Ruak, atu bainhira formasaun Governu ne’e ramata ona, membru Governu kompletu ona no sira bele define ka determina fatin própriu ida ba Konsellu,” Riak Leman hateten, segunda ne’e.

Riak Leman informa, Xefe Estadu komprende preokupasaun instituisaun ninian relasiona laiha espasu definitivu veteranu atu halibur malu no hala’o servisu.

“Agora daudaun temporariamente ami okupa espasu ida iha Caikoli, ne’ebé tuir planu sei harii edifisiu ba Tribunal Rekursu,”  nia informa.

Tanba ne’e, CCLN husu atu Prezidente Repúblika bele buka solusaun hamutuk ho Primeiru-Ministru hodi bele atribui edifísiu permanente ba veteranu sira nu’udár espasu prinsipál ba implementasaun programa.

Entretantu, Prezidente Repúblika promulga Dekretu-Lei Estatutu CCLN, iha 21 marsu 2018, ho objetivu atu envolve veteranu sira iha dezenvolvimentu nasionál no hadi’ak liután sira-nia moris, ne’ebé sai parte hosi kompromisu Prezidente Repúblika ninian.

Antes ne’e, Komisaun Instaladora hala’o konferénsia iha nivel munisípiu no hili nia reprezentante mai tuir kongresu dahuluk CCLN ninian, iha ne’ebé, Conselho dos Combatentes de Libertação Nacional hala’o kongresu iha 18-20 dezembru 2019 hodi hili estrutura atu lidera organizasaun ne’e.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here