Logo World Vision

DILI, 22 juñu 2020 (TATOLI)-World Vision Timor-Leste (WVTL) fó ona apoiu ekipamentu prevensaun COVID-19 ba Eskola Ensinu Pre-Eskolár, no Bázika, Anjo de Caridade Bebonuk,Dili hodi fasilita estudante sira durante prosesu aprendizajen.

Diretóra Pre-Eskolár no Ensinu Báziku Bebonuk, Me. Felicidade Sequiera Amaral, hateten WVTL fó apoiu fasilidade hanesan máskara no tanke profile bee moos ho kapasidade sei rai bee litru 1100.

Organizasaun ne’e sei instala tanke kompleta kedas ho torneira iha portaun prinsipal eskola nian  nune’e bele fasilita estudante no profesór hodi fase liman molok no depois partisipa prosesu aprendizajen.

“Ami agora halo hela preparasaun hodi kompleta item hitu ne’ebé Ministériu Saúde rekomenda ba eskola hotu hanesan tenki iha tanke ho bee inklui sabaun, hands sanitizer, máskara, tenki kumpre distansia sosiál, tenki halo limpeza eskola lorloron, kada semana iha sábadu tenki halo dezinfekta ba eskola,” dehan nia ba TATOLI, iha salaun Eskola  Bázika Filiál Nularan Bairo dos Grilhos, sabadu (20/06).

Husi parte eskola nian daudaun ne’e prepara ona balde 11 kompleta ho torneira hodi koloka ba total sala hamutuk sanunu-resin-ida.

Kona-ba distansiamentu fizíku, nia tenik tan eskola fahe ona orariu ba prosesu aprendizajen iha oras parte dader ho meudia.

“Ami sei fahe tuir rekomendasaun Ministériu Edukasaun nian kada sala minimu 15 no másimu 20 tan ne’e ami halo ona turma rua A ho B, dader turma A hahú tuku 08:00-10:00 depois tuku 10:00-12:00 ba pre-eskolár no meudia turma B hahú tuku 13:00-15:00 depois 15:00-17:00 ne’e ba ensinu báziku  nune’e estudante sira bele atinje oras haat iha prosesu ensinu aprendizajen,”nia esplika tan.

Eskolár Pre-Eskolár no Ensinu Báziku Bebonuk iha estudante hamutuk ema na’in 340 ho profesór 13.

Nia hatutan eskola ne’e sei hahú ninia prosesu aprendizajen hafoin ekipa tékniku finaliza prosesu instalasaun tanke no torneira fase liman.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here