Portavóz CIGC, Odete Viegas. Imajen Tatoli/Egas Cristovão

DILI, 22 juñu 2020 (TATOLI)Maski Governu deside ona taka fronteira terrestre no iha loron loron 2 juñu foin hahú loke maibé ho limitasaun ba kada semana ida dala ida, iha kuarta durante oras rua nia laran, maibé nafatin iha sidadaun balun ne’ebé tama ilegál husi Indonézia mai Timor-Leste.

“Kazu ema ne’ebé maka tama ilegál to’o ohin loron hamutuk ema nain-75, husi totál ne’e, ema ne’ebé tama husi Oé-cusse hamutuk ema na’in- 29, Dili na’in-30 no Suai na’in-16,” informa Portavóz Sala Situasaun Sentru Integradu Jestaun Krize (CIGC, sigla portugés) Odete Viegas liuhosi konferénsia imprensa iha Sala Sentru Mídia COVID-19, iha Sentru Konvensaun Dili (CCD, sigla portugés), segunda ne’e.

Tuir atuál Diretora Jerál ba Prestasaun Servisu Ministériu Saúde ne’e, ema sira ne’ebé tama ilegál nafatin submete ba teste laboratóriu no kumpre kuarentena obrigatóriu durante loron 14, iha Dili, Suai no mós balun iha Oé-cusse.

“Ema sé de’it maka tama iha territóriu nasionál sei submete ba hasai amostra tanba sira mai husi país ne’ebé maka afetadu,” nia akresenta.

Biban hanesan, Portavóz CIGC husu ba populasaun tomak no mós autoridade iha nível munisípiu no nasionál atu kolabora nafatin ho entidade relevante, liuliu ho ema sira ne’ebé servisu iha liña frente atu nafatin koopera karik iha suspeitu ba COVID-19 tenke informa ba autoridade maka kompetente, nune’e bele evita transmisaun iha komunidade sira.

Jornalista : Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here