Prezidente Rotary Club, Janio Tilman, oferese hela sasan nesesidade baziku ba Komunidade iha Suku Ulmera Postu Administrivu Bazartete Munisípiu Liquiça /Imajen Hortencio Sanchez.

DILI, 22 juñu 2020 (TATOLI)-Organizasaun Rotary Club Lafaek Timor-Leste  ho inisiativa fó apoiu sasán nesesidade báziku ba família kbi’it la’ek hamutuk 95 iha Aldeia rua hanesan Nauner no Fatubesilolo Suku Ulmera Postu Administrivu Bazartete Munisípiu Liquiça durante implementasaun Estadu Emerjénsia liga ho moras COVID-19 iha Timor-Leste.

Sasán nesesidade báziku ne’ebé sira distribui ona iha domingu (21/06) maka hanesan foos, mina, manutolun, sabaun no seluk tan ho objetivu atu rekupera hikas ekonomia ba família kbi’it laek hirak ne’e tanba afeta diretamente husi implementasaun EE.

Estadu dekreta ona Estadu Emerjénsia liga ho moras coronavirus durante fulan-tolu hahú iha marsu to’o juñu 2020.

“Ami halo ida ne’e ba dala rua ona, foinlalais ami apoiu iha Dare, agora ita halo ne’e faze da-rua nian foka liu iha área Liquiça nian liliu Suku Ulmera iha aldeia rua,” informa Prezidente Rotary Club,  Janio Tilman, ba jornalista sira iha Ulmera, domingu ne’e.

Nia dehan tulun ne’e parte ida atu hametin lasu amizade entre Rotary Club ho Komunidade rurál tanba tuir planu husi Organizasaun ne’e sei estabelese programa balun iha área edukasaun ba joven sira.

Iha oportunidade ne’e, sira halo mós introdusaun kona-ba ejistensia Rotary Club hanesan Organizasaun joven ne’ebé serbí ho ispiritu voluntarismu hodi liga komunikasaun entre Timoroan ho Timoroan, Timoroan ho Rotary Club iha mundu tomak.

Iha biban hanesan Xefe Aldeia Nauner, Julio Alves Coreia, hateten agredese ba apoiu ne’ebé oferese ona husi Organizasaun ne’e tanba prienxe ona komunidade ninia nesesidade liliu ba ai-han.

“Hau agradese no orgullu tebes ba organizasaun ne’e tanba bele tulun ona ha’u-nia komunidade sira ne’ebé kbi’it laek durante tempu Estadu Emerjénsia ne’e sira ladun hetan ai-han naton, maibé apoiu ida ne’e bele oituan maibé ami agradese tebes,”dehan Julio.

Apoiu ne’ebé maka sira distribui kada família ida simu foos saku ida, mina litru lima masa ida, manutolun rak ida, sabaun haris no seluk tan.

Entretantu, Rotary Club  ninia atividade distribuisaun ne’e hetan apoiu téknika husi Sangar Santu António.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here