Prezidente Rede Feto Timor-Leste, Judite Dias Ximenes, halo entrevista ho jornalista sira. Imajen/Dok.TATOLI

DILI, 22 juñu 2020 (TATOLI)–Prezidente Rede-Feto Timor-Leste. Judite Dias Ximenes, hateten ekipa Rede Feto hasoru malu ho Vise Primeiru-Ministru ba Asuntu Solidaridade Sosíal no Inkluzaun, Armanda Berta dos Santos, hodi ko’alia kona-ba papél Rede Feto no felisita ba Armanda Berta ne’ebé simu kargu foun nu’udar Vise Primeiru-Ministru.

“Ami nia enkontru ida ohin ne’e ho obetivu prinsipál rua ida hanesan Rede-Feto atu kongratula ami-nia feto maluk ne’ebé oras ne’e daudaun okupa ona kargu hanesan Vise-Primeiru Ministru. Ida seluk mak ami hato’o vizaun, misaun no papél Rede Feto nian iha Timor-Leste”, dehan Judite Dias Ximenes, ba jornalista sira hafoin hasoru malu ho Ministra Silidaredade Sosiál no Inklusaun iha salaun MSSI Caicoli, Dili, segunda ne’e.

Nia hatutan, Rede Feto ninia vizaun no misaun durante ne’e servisu barak liu hanesan organizaun feto servisu iha área asuntu sosiais no ekonómia, tanba ne’e Rede Feeto mai aprezenta kona-ba asuntu sira ne’e.

Ko’alia kona-ba asuntu sosiais, nia hateten, plataforma asaun kobre buat hotu maibé ko’alia kona-ba asaun planu nasionál 1325 feto paz no seguransa, no planu asaun nasionál violensia bazeia ba jéneru.

Iha sorumutu ne’e, tuir nia, parte Rede Feto mós hato’o kona-ba deklarasaun Maubise ne’ebé mak atu hakbiit feto rurál sira-nia ekonómia. Tanba, nia dehan, maiória populasaun hela iha área rurál.

“Tanba ne’e exselénsia mós asina hotu deklarasaun Maubise ne’e no iha ministériu lubuk ida mak asina deklarasaun Maubise nomós Banku Nasionál Sentrál Timor-Leste (BNCTL),” nia dehan.

Tanba ne’e, nia hateten, ohin ne’e Rede Feto husu ba Vise Primeiru Ministru asuntu Sosial sei iha reuniaun regulár ida ba Rede Feto, nune’e bele atualiza monitorizasaun ne’ebé mak halo reativamente ho feto nia ekonómia iha área rurál.

“Entaun, ami mós husu ba exselénsia katak sei iha reuniaun regulár mak ami sei atualiza ami-nia monitorizasaun ne’ebé mak ami halo reativamente ho feto nia ekonómia iha área rurál ne’e. Ami sei atualiza ami-nia monitorizasaun ho servisu iha parte sosiál ninian. Ami ho ministra regularmente ami husu fulan ne’e dala ida maibé hosi gabinete ministra nian dehan se bele fulan ida ka fulan tolu depende ba nesesidade ne’ebé mak iha,” nia dehan. 

Jornalista : Osória Marques

Editór    :  Cancio Ximenes

HAKEREK NO HATÁN

Please enter your comment!
Please enter your name here