Ambiente iha sala plenáriu Parlamentu Nasionál. Imajen Tatoli/Egas Cristovão

DILI, 22 juñu (TATOLI) – Parlamentu Nasionál (PN) aprova ona pedidu levantamentu estraordinária husi Fundu Petrolíferu daruak ho montante millaun $286,8, iha diskusaun jeneralidade ho rezultadu votasaun a-favór 41, kontra 0 no abstesaun 19.

Proposta ne’ebé submete husi Governu maka lei númeru 17/V (2) kona-ba realizasaun ba tranferénsia estraordinária Fundu Petrolíferu daruak durante tinan 2020 no alterasaun dahuluk ba lei númeru 2/2020, loron 6 abríl.

“Ho nune’e, proposta lei númeru 17/V (2) pasa iha jeneralidade,” tenik Prezidente Parlamentu Nasionál (PPN), Aniceto Guterres, hafoin anúnsia rezultadu votasaun iha sala plenáriu PN, segunda ne’e.

Notísia Relevante: Govenu Aprova Proposta Pedidu Levantamentu Millaun $286,8 Husi Fundu Petrolíferu

Tuir PPN, sei iha proposta tolu husi deputadu sira atu debate tan iha diskusaun espesialidade.

Prezidente Komisaun C, ne’ebé trata asuntu Finansa Públika, Maria Angélica Rangel, informa husi orsamentu millaun $286,8, atu reforsa kofre Estadu finánsia servisu administrasaun públika ho montante millaun $168,8 no antesipa despeza hasoru COVID-19 inklui rekuperasaun atividade ekonómika ho alokasaun millaun $100 ba Fundu COVID-19 to’o Orsamentu Jerál Estadu (OJE) 2020 vigora.

“Rekomenda atu labele halo impréstimu ba orsamentu seguransa sosiál, ba apoia ekonómiku no subsídiu. Presiza urjente pagamentu ba subsídiu uma-kain iha Oé-cusse ne’ebé sei pendente hela,” dehan atuál Deputada Bankada Governu Fretilín ne’e.

Nune’e mós, Deputadu Bankada Governu PLP, Abel Pires, argumenta razaun a-favór ba proposta Governu ne’e tanba konsidera pedidu levantamentu ba Fundu Petrolíferu ne’e pertinente atubele reforsa kaixa Estadu no aloka tan ba Fundu COVID-19.

Deputada Bankada Opozisaun CNRT, Virgínia Ana Belo, fó apoia ba pedidu Governu ne’e maibé husu ezekutivu sira presiza halo jestaun di’ak, liuliu ba Fundu COVID-19 hodi labele iha  diskriminasaun ba benefisiáriu sira no apoia ekonómiku.

Opiniaun hanesan maihusi Deputada Bankada Opozisaun UDT/FM, Isabel Maria Freitas Ximenes, konsidera levantamentu estraordinária ne’e pertinente, maski nia parte sei iha dúvida oituan iha alokasaun orsamentu.

“Ha’u la kestiona Governu hato’o levatamentu Fundu Petroliféru tanba presiza reforsa tezouru Estadu hodi finansia mákina Estadu, maibé iha dúvida oituan iha alokasaun ba Fundu COVID-19 tanba balun seidauk ezekuta,” nia akresenta.

Tuir ajenda, diskusaun iha faze espesialidade no finál globá sei kontinua aban iha sala plenáriu.

Antes ne’e, iha loron 2 abríl PN aprova pedidu levantamentu Governu no iha loron 6 abríl Prezidente Repúblika, Francisco Guterres ‘Lú Olo’ promulga ona Dekretu Parlamentu Nasionál númeru 14/V, kona-ba autorizasaun ba realizasaun transferénsia estraordinária husi Fundu Petrolíferu ho montante millaun $ 250.

Husi totál orsamentu millaun $250 ne’ebé aprovadu, millaun $150 aloka ba finansiamentu medida prevensaun no kombate moras COVID-19 iha ámbitu Fundu COVID-19, millaun $100 ba konta jerál tezouru no husi millaun $150 ne’e, aloka $500.000 ba PN atu dezenvolve polítika no programa iha ámbitu prevensaun no kombate surtu COVID-19.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here