Serimónia Lansamentu ba Portál Informasaun no Teknolojia Partidu Demokratiku (PD) nian iha Sede Nasionál Colmera. Imajen Tatoli/Cipriano Colo.

DILI, 22 Juñu 2020 (TATOLI)–Partidu Demokrátiku (PD), ohin, hahú moderniza ninia servisu sira liuhosi portál Informasaun no Teknolojia ne’ebé lansa hosi Prezidente Mariano Asanami Sabino iha Sede Nasionál Colmera, Dili.  

Iha serimónia lansamentu ne’e, Assanami iha esperansa katak ho portál ne’e sei fasilita liután hodi habelar informasaun hakbesik liu ba militante no simpatizante sira iha baze.

“Ita hein katak ho Portál  Informasaun  no Teknolojia  ne’ebé mak ita iha bele fasilita ita, atu bele sai na’in hodi besik liu ba partidu no besik malu liután ba baze. Aleinde ne’e, liuhosi pubikasaun sira, ita-nia maluk sira iha Iliomar no Fatululik, bele asesu lalais liu. Ho grasa Maromak nian no mós tulun hosi erói funu na’in sira ne’ebé husik hela ita, fó valór, ne’ebé mak ita sei hatutan nafatin no ita hein katak ho lansamentu ida-ne’e, sei la’o no sei reforsa liután instituisaun ida-ne’e atu bele fasilita ninia servisu ne’ebé efetivu liután,” dehan Asanami iha ninia intervensaun.

Entretantu, Primeiru Vise Sekretáriu Jerál Partidu Demokrátiku, Arcânjelo Leite hateten, PD iha ona ninia Portal Informasaun no Teknolojia rasik, ne’ebé sei iha programa barak. Maibé importante katak portál ida-ne’e sei fasilita PD atu halo atendimentu di’ak liu ba ninia kuadru no ninia militante sira ho ninia simpatizante sira.

“Ho Portáli da-ne’e, Partidu Demokrátiku hahú moderniza ninia servisu. Ho lansamentu portál ida-ne’e mós Partidu Demokrátiku hahú eletronija ninia atendimentu ba ninia militante sira, loke dalan mós atu aban bainrua bele halo atendimentu ba públiku. Ida-ne’e mak objetivu prinsipál hosi portal ne’e rasik,” Arcânjelo Leite esplika.

Arcânjelo  rekoñese iha primeira faze sente katak sei iha dezafiu maibé Partidu Demokrátiku hahú inisía ninia atendimentu ne’e, liuhosi portal ne’e no iha futuru, liuhosi portál ne’e mós sei eletronija ninia servisu administrasaun nian.

Partisipa iha serimónia lansamentu ne’e, Kuadru sira Partidu Demokrátiku no mós funsionáriu iha sekretariadu PD nian.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here