Primeiru-Ministru, Taur Matan Ruak prezide Reuniaun Extraordinária Konsellu Interministeriál ba Protesaun Sívil no Jestaun ba Dezastre Naturál, iha Palásiu Governu, segunda (22/06). Imajen Tatoli/Egas Cristovão

DILI, 22 juñu 2020 (TATOLI) – Primeiru-Ministru (PM), Taur Matan Ruak prezide reuniaun Komisaun Interministeriál kona-ba protesaun sivíl no jestaun ba insénsiu inklui dezastre naturál ne’ebé akontese dezde outubru 2019 liubá to’o maiu 2020.

Ministru ba Prezidénsia Konsellu Ministru, Fidelis Manuel Leite Magalhães, dehan reuniaun komisaun ne’e atu resposta ba impaktu dezastre naturál sira ne’ebé maka akontese iha outubru 2019, 13 marsu 2020, no ikus liu inundasaun iha maiu 2020 ne’ebé akontese iha Kosta Súl no parte Leste.

“Objetivu reuniaun ne’e atu halo avaliasaun ba medida hotu ne’ebé Governu foti ona hodi responde ba vítima, haree ba apoia familiár hanesan hela fatin hira maka estraga, asesu ba ai-han no ba nesesidade bázika sira ne’ebé mak iha koordenasaun ho Ministériu Administasaun Estatál (MAE). Nune’e Governu bele hetan informasaun no halo esforsu atu hadi’a filafali infraestrutura ne’ebé maka hetan estragu durante dezastre naturál”, hateten Ministru Fidelis liuhosi konferénsia imprensa iha Palásiu Governu hafoin reuniaun ne’e ramata, segunda ne’e.

Tuir dadus ne’ebé relata hosi governante ne’e katak iha outubru 2019, iha família hamutuk 2.979 maka afetada husi inséndiu ahi-han no anin boot ne’ebé mak mak akontese iha munisípiu sira hanesan Aileu, Ainaro, Bobonaro, Ermera no Liquiçá.

“Ohin verifika katak populasaun sira ne’ebé maka sai vítima hetan apoiu ho totál orsamentu $933.806, ne’ebé iha atuasaun Governu fó mós apoia ai-han no materiál konstrusaun hodi bele hadi’a filafali sira-nia uma,” nia akresenta.

Iha reuniaun ne’e Sekretáriu Estadu Protesaun Sivíl, Alexandrino de Araújo aprezenta dadus kona-ba inséndiu iha Colégio Maliana, Munisípiu Bobonaro ne’ebé akontese iha 1 marsu 2020.

Husi aprezentasaun ne’e hatudu dadus dezastre naturál ne’ebé akontese iha 13 marsu 2020 iha Dili ho totál família vítima hamutuk 4.681.

“Apoia husi Governu liuhosi Sekretaria Estadu Protesaun Sivíl (SEPS) kompostu husi ai-han, la’ós ai-han no materiál konstrusaun sira,” nia subliña.

Relasiona ho dezastre naturál ne’ebé akontese iha Munisípiu Baucau, Covalima, Lautém, Manatuto, Manufahi, Viqueque, Governu fó ona apoia ho valór osan hamutuk $450.000.

Biban ne’e, Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos mós aprezenta dadus kona-ba apoia hirak ne’ebé mak Ministériu Solidariedade Sosiál no Inkluzaun (MSSI) ho koordenasaun husi ministériu seluk fó ona ba vítima.

Nune’e mós, Ministériu Obra Públika (MOP) nia parte aprezentasaun ida kona-ba obra hirak ne’ebé halo tiha ona no esforsu ne’ebé MOP halo hamutuk ho ministériu sira seluk no mós ajénsia sira hodi bele hadi’a filafali infraestrutura hirak ne’ebé hetan estragu tanba dezastre naturál ne’ebé akontese iha 13 marsu 2020 iha Dili.

MOP aprezenta dadus projetu hirak ne’ebé mak la’o hela hanesan reabilitasaun estrada no ponte sira ne’ebé hetan estraga tanba bee boot no inundasaun ne’ebé akontese iha maiu 2020 iha Kosta Súl no parte Leste.

Hafoin rona aprezentasaun husi ministériu tutela sira, Xefe Governu kongratula esforsu hirak ne’ebé ministériu sira halo atubele fó apoia ba sidadaun sira no foti medida hodi hadi’a filafali estragu hirak ne’ebé akontese.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here