Prezidente Arquivo Museum de Resistência Timor-Leste (AMRT), Instituisaun Públiku (I.P), Hamar Antoninho Baptista Alves

DILI, 22 juñu 2020 (TATOLI)–Diretór Ezekutivu no Prezidente Arquivo & Museu da Rezistencia Timorense (AMRT), Hamar Antoninho Baptista Alves hateten, ohin, Konsellu Libertasaun Nasionál (KLN) entrega ka depozita ona dokumentu antigus kombatente (veteranu) sira-nia ba iha AMRT hodi prezerva memória testemuña moris sira-nian.

“Ohin loron. ita simu dokumentu atingu kombatentes ne’ebé mak rejistu hahú hosi tinan 2002-2009 nian. Maibé, ita mós iha tan servisu ida mak oinsa prezerva memória ba testemuña moris sira-nian ne’ebé mak rejistu ona no barak mak tama ona ba faze edisaun nian, no barak mós mate ona tanba Maromak bolu fila tiha ona,” dehan Hamar Antoninho Baptista Alves ba jornalsita sira iha AMRT, Dili, segunda ne’e. 

Nia informa, AMRT rekolla dokumentu hahú hosi tinan 2002 to’o ohin loron prezerva ona dokumentu hamutuk 100.000-resin, dijitaliza mak 160- resin no disponivél ona online ba 50.000.

Tanba ne’e, nia hatutan, timoroan sira ne’ebé sei moris ne’e presiza servisu hamutuk, hodi prezerva sira-nia istória balun durante iha sira-nia luta ne’ebé mak seidauk hakerek.

Entretantu, Sekretáriu Estadu Asuntu Kombatente Libertasaun Nasionál (SEAKLN), Gil da Costa “Oan Soru”, hateten dokumentu ne’e ko’alia kona-ba rejistu dokumentu manuál hotu-hotu nian ne’ebé mak hahú hosi tinan 2003, 2005 inklui ho 2009 nian.

“Ita seidauk verifika hotu tanba iha 2019 ita foin mak verifika no foin mak atinje 14%. Depois ita hasoru situsaun oin-oin hanesan situasaun polílika, situasaun orsamentu no mós situasaun Coronavirus (COVID-19) entaun para tiha,” nia dehan.

Maibé, tuir nia, en-prinsipeiu tuir artigu 21 no artigu 22 iha estatutu Kombatente Libertasaun Nasionál nian katak presiza atu konserva duni dokumentu hotu-hotu, tanba ne’e mak dokumentu hotu-hotu sei lori mai tau iha AMRT. 

“Ohin lori mai ne’e abertura simbolikamente de’it. Dokumentu hotu-hotu ne’ebé mak rejistadu no agora daudaun iha hela Konsellu Veteranu nian ne’e sei lori hotu mai tau iha fatin ne’e. Kada ema-nia prosesu iha mak husik ne’ebá maibé dokumentu fíziku hotu tenke tau iha AMRT nian,” nia hateten. 

Nia haktuir, iha rejistu dahuluk ema iha besik 75.000 no rejistu daruak nian ema iha 124.600-resin.

Jornalista : Osória Marques

Editór    :  Cancio Ximenes

HAKEREK NO HATÁN

Please enter your comment!
Please enter your name here