Komandante Polísia Munisípiu Dili, Superintendente Xefe, Armando Monteiro. Imajen/Eugénio Pereira

DILI, 22 juñu 2020 (TATOLI) – Durante fulan neen (6), husi janeiru too juñu 2020, Komandu Polísia Munisípiu Dili  kobre reseita hamutuk $18.748 hodi kontribui ba kofre Estadu.

Osan sira ne’e Polísia Munisípiu Dili liuhosi Unidade Tránzitu kobre husi infratór sira ne’ebé lori transporte viola sinais tránzitu no kontra lei kódigu estrada.

“Husi  janeiru  too mai juñu, iha semana daruak nian, ita rekolla ona montante $18.748 hodi hatama ba iha kofre Estadu,” dehan Komandante Polísia Munisípiu Dili, Superintendente Xefe, Armando Monteiro ba jornalista, ohin.

PNTL kontinua halo vijilánsia másimu hodi kontrola movimentu transporte sira ne’ebé para iha trotoar leten no viola sinais tránzitu hodi aplika tuir lei no aplika koima tuir lei.

PNTL mós halo apreensaun ba motorizada sira ne’ebé viola kódigu estrada, para sala, la uza kapasete, laiha xapa matríkula, no la iha asesoria no komentarista sira ne’ebé la iha karta kondisaun.

Komandante Armando apela ba públiku bainhira lori transporte tenke respeita lei no para transporte iha fatin estasionamentu ne’ebé prepara ona iha área sidade Dili.

“Ita nia lei kódigu estrada ita disemina no sosializa beibeik, maibé kondutór sira iha kualifikasaun ezame no pratika tuir loloos ajuda Estadu no polísia hodi kumpre regra, mais se sira viola sinais sira tenke selu multa,” Armando Monteiro hateten.

PNTL sei kontinua aplika lei kódigu estrada, lei 28/2017 kona-ba kontrola movimentu transporte públiku iha territóriu Timor-Leste, lei estasionamentu, no lei kódigu penál Timor-Leste hodi evita asidente tráfegu.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here