Embaxadór Indonézia ba Timor-Leste, Sahat Sitorus. Imajen Tatoli/Cipriano Colo

DILI, 22 juñu 2020 (TATOLI)-Embaixadór Indonézia iha Timor-Leste, Sahat Sitorus, deklara Estadu Timor-Leste iha ona preparasaun di’ak iha pilár ekonomia no seluk tan hodi bele adere ona ba Organizasaun the Association of Southeast Asian Nations ka AZEAN.

Governu Indonézia dezde uluk kedas mantein ninia pozisaun maka atu Timor-Leste adere ona ba Organizasaun iha Rejiaun Sudeste Aziátiku ne’e.

“Indonézia uluk kedan apoiu maibé AZEAN ne’e konsensu husi membru 10 ne’e ida seidauk aseita entaun seluk ne’e mós sei hein, maibé ita labele deskontente dalaruma membru hanesan Singapura haree fatór ki’ik balun seidauk prienxe rekezitu mak sira seidauk aseita ne’e, ita koko nafatin,” dehan, Sahat Sitorus, ba Jornalista sira iha Palacio do Governo Dili, segunda ne’e.

Mezmu Singapura seidauk aseita nasaun foun ne’e ninia adezaun, maibé Indonézia observa Timor-Leste iha ona kapasidade tanba antes ne’e bele lidera eventu sira hanesan  ASEAN Regional Forum (ARF) no seluk tan.

“Ha’u tinan tolu ona iha ne’e hare Timor-Leste prontu los atu sai hanesan membru AZEAN, fiar katak membru seluk bele haree no halo evaluasaun iha sala oituan laiha buat ida importante halo hotu kriteria ne’ebé Sekretariadu AZEAN husu,” tenik Sahat.

TL durante ne’e partisipa bebeik eventu sira AZEAN nian ne’e hatudu sinal pozitivu ba polítika Estadu nian atu hola parte ba organizasaun refere.

“Reuniaun bo’ot sira AZEAN nian konvida Timor-Leste partisipa, ida ne’e bele dehan Timor-Leste sai ona hanesan membru, labele sai membru baluk deit  maibé tenke membru kompletu maibé ba oin ita sei haree hamutuk, Timor-Leste tenke esforsu nafatin,” nia hatutan.

Jornalista  : Hortencio Sanchez

Editór        : Agapito dos Santos

HAKEREK NO HATÁN

Please enter your comment!
Please enter your name here