Embaixadór Indonézia ba Timor-Leste, Sahat Sitorus. Imajen/Egas Cristóvão

DILI, 22 juñu 2020 (TATOLI)-Governu Indonézia liuhosi ninia Embaixadór iha Timor-Leste, Sahat Sitorus, hateten maske situasaun polítika iha nasaun foun ne’e la’o ladun di’ak maibé la afeta ba estabilidade Nasionál.

Diplomata husi Nasaun Viziñu Indonézia hato’o observasaun ne’e hafoin hasoru malu ho Primeiru-Ministru, Taur Matan Ruak, iha Palacio do Governo Dili, segunda ne’e.

“Hanesan nasaun amigu hare polítika iha nasaun ne’e la’o diferente maibé estabilidade nasaun nian metin nafatin,” dehan nia.

Ho maturidade polítika ne’ebé maka iha, nia dehan sei suporta atu aselera prosesu dezenvolvimentu nasaun nian tanba iha estabilidade nasionál.

Nia hatutan durante hasoru malu, Xefe Governu mós relata kona-ba situasaun polítika ne’ebé akontese iha ra-laran liliu mudansa iha estrutura Governu konstitusionál daualu ho Parlamentu Nasionál.

“Primeiru Minitru mós ko’alia mai ha’u kona-ba mudansa iha Governu no Parlamentu Nasionál maibé situasaun sei mantein di’ak iha nasaun demokrátiku ne’e, Primeiru-Ministru mós ko’alia mai ha’u kona-ba membru governu na’in 19 sei simu pose iha tempu besik fiar katak membru hirak ne’e sei hala’o servisu ho di’ak,” tenik Sahat Sitorus.

Indonézia fiar katak ho Membru Governu foun ne’e sei aselera di’ak liután prosesu dezenvolvimentu no mós estabelese kooperasaun ho nasaun seluk tan hodi dezenvolve ekonomia rai-laran.

Nia sublña Governu Indonézia kontinua prontu atu servisu hamutuk ho Timor-Leste hodi dezenvolve nasaun ne’e iha área importante sira.

Jornista : Hortencio Sanchez

Editór    : Agapito dos Santos

HAKEREK NO HATÁN

Please enter your comment!
Please enter your name here