Imajen/Mídia PR.

DILI, 22 juñu 2020 (TATOLI)–Prezidente Administrasaun Conselho dos Combatentes de Libertação Nacional (CCLN-sigla Portugés), Vidál de Jesus ‘Riak Leman’ hateten, programa prioridade CCLN nian kontinua pendente to’o agora tanba Timor-Leste enfrenta hela impase politika no surtu Coronavirus (COVID-19).

Notísia Relevante: CCLN Apoiu Nafatin VIII Governu Tanba Nasaun Labele Hakiduk Fali ba Kotuk

“Durante ne’e ita enfrenta hela impase politika no mós situasuan surtu COVID -19, nune’e programa prioridade CCLN nian kontinua pendente no to’o agora hein hela orsamentu ruma,” dehan Prezidente Administrasaun CCLN, Riak Leman, ba jornalista sira, hafoin hamutuk no ninia estrutura, hasoru malu ho Xefe Estadu Francisco Guterres Lú Olo, iha Palásiu Prezidente Nicolau Lobato, Bairru Pité, Dili, segunda ne’e.

Nia esplika, programa prioridade sira hosi CCLN mak sei kontinua haree kona-ba verifikasaun ba dadus ne’ebé uluk halo hela., tanba orsamentu laiha maka agora verifikasaun ne’e para hela. Progarama ida fali, nia dehan, oras ne’e daudaun CCLN iha koordenasaun manas hela ho Prezidente Komisaun Omenajen, atu transfere atividade komisaun omenajen nian ba CCLN.

“Iha mós ezijénsia veteranu sira nian, dehan estrutura konsellu nian tenke tun ba baze hodi haree mós kona-ba sede ba konsellu munisipal sira, transporte ba konsellu munisipál sira nian. Iha buat barak ne’ebé mak presiza hala’o maibé orsamentu mak seidauk iha,” nia esplika.

Kona-ba ne’e, nia dehan, Prezidente Repúblika konsidera asuntu veteranu nu’udár prioridade ida ba Xefe Estadu, tanba ne’e husu atu entrega planu servisu organizasun nian hodi kontinua tau matan.

Aleinde ne’e, Prezidente Administrasaun CCLN hein katak iha tempu badak bele aprezenta planu orsamentu no aprova iha Parlamentu Nasionál atu fasilita programa ne’ebé aprova tiha ona.

Entretantu, Prezidente Repúblika promulga Dekretu-Lei Estatutu CCLN, iha 21 marsu 2018, ho objetivu atu envolve veteranu sira iha dezenvolvimentu nasionál no hadi’ak liután sira-nia moris, ne’ebé sai parte husi kompromisu Prezidente Repúblika ninian.

Antes ne’e, Komisaun Instaladora hala’o konferénsia iha nivel munisípiu no hili nia reprezentante mai tuir kongresu dahuluk CCLN ninian, iha ne’ebé, Conselho dos Combatentes de Libertação Nacional hala’o kongresu iha 18-20 dezembru 2019 hodi hili estrutura atu lidera organizasaun ne’e.

Notísia Relevante: CCLN Apoiu Nafatin VIII Governu Tanba Nasaun Labele Hakiduk Fali ba Kotuk

Jornalista : Cipriano Colo

Editór        :  Cancio Ximenes

HAKEREK NO HATÁN

Please enter your comment!
Please enter your name here