Vise Primeiru-Ministru kaer Asuntu Solidariedade Sosiál no Inkluzaun, Armanda Berta dos Santos. Imajen/Egas Cristovão.

DILI, 22 juñu 2020 (TATOLI)–Governu liuhosi Vise Primeiru-Ministru kaer Asuntu Solidariedade Sosiál no Inkluzaun, Armanda Berta dos Santos, hato’o parabéns ba ekipa pagamentu subsídiu $200 ba iha munisípiu 12 la inklui Rejiaun Administrativa Espesiál Oé-Cusse Ambeno (RAEOA).

Vise Primeiru-Ministru ne’e hatutan, maski durante ne’e iha dezafiu balu ne’ebé mak ekipa pagamentu sira hasoru iha terrenu maibé sira konsege liu dezafiu sira ne’e to’o agora.

“Ha’u nia mensajén ba ekipa pagamentu mak liuliu ha’u fó parabens ba ha’u-nia ekipa pagamentu sira ne’ebé mak durante ne’e halo pagamentu $200 ba kumunidade iha munisípiu 12, la inklui RAEOA, ne’ebé hahú hosi loron 9 fulan juñu to’o agora la’o ho di’ak. Mezmu iha dezafiu balu ne’ebé sira hasoru hanesan iha transporte ne’ebé iha asidente kiik-oan balun, maibé sira auguenta buat hotu la’o ho di’ak,” dehan Armanda Berta dos Santos, ba jornalista sira hafoin hala’o audénsia ho Refe feto iha Salaun MSS, Caicoli, Dili, segunda ne’e.

Nia fó parabens ba ekipa pagamentu tanba durante ne’e akompña katak maski fahe subsídiu ba komunidade to’o kalan ona maibé hosi parte pagamentu sira kontinua nafatin atende komunidade ho di’ak.

“Durante ekipa tekniku sira iha terrenu fahe subsídiu ba komunidade ita haree mezmu kalan ona bele para maibé sira soe tempu nafatin hodi atende ita-nia komunidade ho di’ak,” nia tenik.

Nia dehan, ekipa pagamentu iha munisípiu sira ne’ebé rama ona sei haforsa ekipa pagamentu iha Dili tanba Dili mak to’o agora seidauk bele finaliza.

“kona-ba pagamentu parte munisípiu kuaze hotu ona no ita bele haree katak pagamentu ne’e iha Dili mak seidauk hotu. Entaun, ita bele aumenta loron ida ka rua atu bele aselera ba pagamentu ida-ne’e, signifika katak sei hotu iha semana ida-ne’e. Munisípiu sira hotu ona no parte tékniku mai reforsa fali iha Dili nian,” nia dehan.

Nia haforsa tan, maski hosi MSSI sei aumenta loron ida ka rua hodi fahe subsidiu ba komunidade maibé sei la aumenta tan perdiem tanba osan transporte ka perdiem ne’e selu dala ida de’it. 

Jornalista : Osória Marques

Editór      :  Cancio Ximenes

HAKEREK NO HATÁN

Please enter your comment!
Please enter your name here